WAN - Cinîyê ke mîyanê erdan de 12 saet mesaî de yê, camêrdan ra hîna tay pere gênê û dimayê ke yenê keye zî kar kenê, ewnîyenê tutan ra û 6 saetî mesayî zî keye de kenê. Cinîyê ke bi barê giran dest bi roje kenê, rojaneyê înan 60 TL yo. Hîn ci ra bi nê pereyî 5 lître rûn gênê û hîn zî hewl danê ke bi nê pereyî tutanê xo mird bikerê.

 

Bi ameyîşê hamnanî dir germbîyayîşê ke reseno 36 dereceyî, bêşik tewr zêde tesîr serê kesê mîyanê erdan de xebityeno keno. Cinîyê ke mîyanê erdan de 12 saetan xebityenê, eynî wextî de 6 saetan zî keye de kar kenê û tutan rê ewnîyenê. Cinîyê ke bi camêrdan dir mîyanê erdan de eynî karî kenê,  camêrdan ra kêmî heqdest gênê û no zî mexdurîyetê cinîyan di qat zêde keno. Cinîyê ke mîyanê erdan de firingî, xiyar, zebeş û petêxan dir eleqedar benê, dîyar kenê ke reyan 2 mengî, 3 mengî xebityenê û semedê berardiş newe keweno  bazaran pereyê xo hema nêgirewtê.

 

Sebebê zêdebîyayîşê karkerê cinîyan: Heqdesto kêm 

 

Cinîyê ke xeylê xo taxa Suphanî ya Artemîtê Wanî ra şinê Gewaş de xebityenê, dîyar kenê ke saetê 06.00 de aya benê û 08.00’ de zî dest bi kar kenê. 40 karkerî estê û xeylê xo cinî yê. Sebebê zêdebîyayîşê hûmara cinîyan zî oyo ke heqdestê cinîyan kêm o. Camêrdî bi xeylê xo xebata mîyanê erdan qebul nêkenê û sebebê nê zî xeylê xo semedê sektorê înşatî de xebityenê. Cinî rojane bi 60 TL xebityenê.

 

'Ma nêeşkenê lazimîyê mutbexî zî bigîrê'

 

Gulê Akkoyun ke hewî şîya wina vat: "Semedê ekonomî baş nîya,mecbûr a bixebitya. Bi di mengî yo xebityena. Rojane 60 TL gênê. Ma 6 nufus ê. Mêrdeyê mi înşatî de xebityeno. Ez nêeşkena roşan de cilan bigîra. 5 lître run 75 TL yo. Ma nêeşkenê lazimîyê mutbexê xo bigîrê."

 

'Ma mecbûr ê ke nê germî de bixebityê'

 

Gule vat, aye dayê serê hewî û vat: "Tutê mi nêvirazyayî. Hewîya mi zî astengdar a û 4 tutê aye estê. Semedê astengdarî aye berdî nêweşxane. Nika ez ewnîyena tutanê ci ra. Ez saete 06.00 de şina serê erdî. Ez vaşê mîyanê erdî pak kena. Ma mecbûr ê nê germî de bixebityê. Ma dimayê karî şinê keye, keye de zî her wext serê lingan de yê. Ma cilan, firaqan şunê û tutan wey kenê. Ma werd zî viraznenê. Ez 20 deqeyan nêeşkena roşî. Ezîyet bi qedare ma."

 

'Ez nêwazena tutê mi hewceyê kesî bê'

 

Hulya Olgur zî dîyar kerd ke 6 tutê ci estê, 4 hebî wendekar ê, keye de aye xebityena û vat: "Bi 20 rojî yo mi dest bi kar kerdo. La hema ma pere nêgirewto. Yewin waştişê mi oyo ke tutê mi hewceyê kesî nêbê."