Sena Dolar

 

STENBOL - Sereka Şubeyê ÎHDyê Stenbolî Gulseren Yolerî, dîyar kerd ke grevê vêşanîye yê bêdem û bidor dewam keno û wina vat: "Dimayê ke merdiş bibo, manaya mojnayîşê hîsgêrî çin o. Hema ke merg çin o, ganî problemî bêrê çareserkerdene."

 

Tepişteyê PKKyî û PAJKî hemverê tecrîdê ke 22 serrî yo vera Rayberê PKKyî Abdullah Ocalanî yeno kerdene û binpaykerdişê heqê tepişteyan 27ê teşrîna peyêne 2020 de dest bi grevê vêşanîye kerdî. Koma 45ine çalakîya grevê vêşanye dewr girewt û grev 225 rojî pey xo de verda. Tecrîd, pêkerdişê mîyanneteweyî ke Tirkîya zî îmza kerda û destûrê bingehîn de sey îşkence ca gêno. Tepişteyê ke çalakîya grevî dewam kenê zî dîyar kenê ke ganî dewlete berpirsyarîyê pêkerdişê ke îmza kerda bi ca bîyaro. Sereka Komeleya Heqê Merdiman (ÎHD) yê Stenbolî Gulseren Yolerî dîyar kerd ke grevê vêşanîye sey îqazêk ê û vat, ganî komel û selahîyetdarî vera nê îqazî hîsgêr bê.

 

'Rîskê çalakîya grevê vêşanîye ya bêdem-bidor esto'  

 

Gulserene dîyar kerd ke demêk derg o grev dewam keno û vat: "Nika rîskê ke bivurnê grevê vêşanîye yê bêdem û bêdo esto. Ma pêro zanê ke no rîsk yeno çi mana. Grevî bidor de xeylêk tepişteyî mecbûr mendî bikewê grev. Demêk kilm la bi mabênêk kilm kewtişê grevan zî bi qasê grevê bidor bi rîsk o. Ma nê zî eşkerayîyê doktoran ra zanê."

 

'Ganî dewlete îşkenceyê ke yenê kerdene vindarna' 

 

Gulserene vat, tepişteyî semedê tecrîdî kewtê grev û vat: "Tecrîd, îşkence û sûcê merdimayî yo. No Qanûnê Cezaya Tirkî de zî wina yo. No caardişê îşkenceyî hemverê desturê bingehîn û qanûnê nê welatî yeno kerdene. No îqtîdaro ke vano, 'îşkence rê sifir tolerans’ ganî lezabez peynîya îşkence bêro. Tecrîdo ke Îmraliyî de yeno kerdene  înfazî de bêtêduştî yo. Caardişê înfazî taybetî yê serê Abdullah Ocalanî yeno kerdene, binpaykerdişê heqê merdiman, pêkerdişê mîyanneteweyî û desturê bingehîn o. Ganî peynîya tecrîdê Îmraliyî bîyarê."

 

'Ganî vera tecrîdî hêzê komelî vejîyo werte'

 

Gulserene tewr peyîn wina vat: "Ganî ma xo ra pers bikerê. Bi mîlyonan kesî hemverê îşkenceyî yo. Zîndanan de îşkence dewam keno. Ganî ma munaqeşe bikerê ke gelo xebatên baş kenê yan ney. Ganî ma berpirsîyarîyê xo bi ca bîyarê. Grev sey îqazêk o. Semedê nê zî dimayê mergan, mojnayîşê hîsgêrî manaya ci çin o. Ganî ma çîyê lazimî bi ca bîyarê. Hema ke mergî nêvirazyayî ganî problemî bêrê çareserkerdene."