Sema Çaglak

 

AMED -  Endama Îdarekara Meclîsê Ciwanan ê HDPyî Gulîstan Yilmaz, dîyar kerd ke tewr zêde hemverê cinîyê ciwan ê  kurdî polîtîkayê şerî yê taybetî yenê kerdene û vat: "La ciwanî do vera her tewir polîtîkayê lêşin de rêxistinbîyayîş esas bigîrê û bi ciwanan dir têkoşînêk hempar bikerê."

 

Tirkîya de serebûtê sîyasî roj bi roje vuryenê. Operasyonê leşkerî yê sînorî yê vera  Herêma Federal a Kurdistanî û operasyonê leşkerî yê herême, krîzê ekonomî, bêkarî, feqîrî û hêrişê hemverê muxalîfan babetêka sereyîn ya Tirkîye ya. Bi taybetî Partîya Demokratîke ya Şaran (HDP) hêrişan ra para xo gêna. Hetêk ra tepiştiş, kuwayîş û heto bîn ra zî qetilkerdiş. Bi taybetî zî heme serebûtî tesîr serê ciwananê kurdan de keno. Derheqê babete de Endama Îdarekara Meclîsê Ciwanan ê HDPyî Gulîstan Yilmaz ajansê ma rê qisey kerd.

 

'Pêro zîndanan de îşkence esto'

 

Gulîstane destpêkê qiseykerdişê xo de bale ant serê tecrîdê serê Rayberê PKKyî Abdullah Ocalanî û vat: "Tecrîdo ke Îmraliyî de yeno kerdene, bi hêzê mîyanneteweyî yeno kerdene. Hemverê perspektîfê çareserî polîtîkayê bêçareserî û polîtîkayê şerî yenê kerdene. No het ra rol û mîsyonê dewleta tirkî zî xeylêk zaf o. Tirkîya tîya de rolê gardiyantî kena. Pêwa nê çîyan hemverê tecrîdî çalakîya grevê vêşanîye zî xeylêk girîng a. Tepişteyî roj çin o ke rastê îşkenceyî nînê. Pêro zîndanan de sîstemê îşkenceyî esto. Sewbîna tecrîdê hemverê Îmraliyî nika pêro zîndana de hemverê tepişteyan yeno kerdene. Na babete de ma bibê vengê tepişteyan û semedê caardişê waştişê tepişteyan têkoşînêk hempar bikerê."

 

'Wehşetê Îzmîrî hemverê fikrê HDPyî bi'

 

Gulîstane dewam de wina vat: "Wehşetê ke Îzmîr de hemverê bînaya HDPyî de ame kerdene zî netîceyê nêçareserkerdişê polîtîkayê tecrîdî yo. Eynî wextî de qetlîam hemverê fikr û fehmê HDPyî bi. Hêrişêk hemverê şarî û cinîyan rê bi. Uca de embaza ma Denîz Poyraz ameye qetilkerdene. Ma zanê ke o gule tena Denîz Poyraz hedef nêgirewt eynî wextî de têkoşînê cinîyan zî hedef giewt. Ma do wayîrê têkoşînê Denîze vejîyê. Tecrît her çiqas ke Îmrali de kûr beno, polîtîkayê nîjadadperestî û verademokrasî zî xo zêdeyêr kenê."

 

‘Tena Farqîn de 20 ciwanî peynîya cuya xo ardî'

 

Gulîstane dîyar kerd ke îqtîdar wazeno bi polîtîkayê xo şar bifetesno û vat: "Rewşa ewro de şar tena yeno verdayîş. Bi taybetî prosesê pandemî de şar tena ame verdayîş. Sey babetê xokiştîşî nê prosesî de xeylêk zêde bî. Goreyê dayeyê fermî Amed de bi taybetî zî Farqîn de 20 ciwanan peynîya cuya xo ardê. Ma veng danê şarê xo, xora no amancê îqtîdarî yo. Sîstem wazeno ke ma bêçare bê. Bi taybetî zî ciwanî vera polîtîkayê îqtîdarî xo bi rêxistin bikerê. Polîtîkayê ke hemverê ciwanan yenê kerdene, netîceyê tecrîdî yê."

 

 'Ma do bi bernameyê tewir tewir bêrê têhet'

 

Gulîstane tewr peyîn wina qalê xebatanê ke kenê de wina vat: "Nika ma sey ciwanê HDPyijî turnûvayê futbolî organîze kenê. 20 tîmê ma estê. Mîyanê tîmî de cinîyê ciwanî zî estê. Amancê ma oyo ke ma ciwanan kulturê kafeyan ra dûrbifînê. Tiryakî û ajanî ra dûrbifînê. Sewbîna ma prosesê pandemî de bi online xebatê atolyeyan kerdibi û ma ewro ra tepya dest bi xebatê rî bi rî kenê. Ma do bi bernameyê tewir bi tewir bêrê têhet."