Sema Çaglak - Şehrîban Aslan 

 

AMED - 224 rojî yo tepişteyî grevê vêşanîye de yê. Bi grevî dir îşkence û şîdetê hemverê tepişteyan zêde beno. Bi taybetî zî Zîndanê Xarpêtî de bi îhlalkerdişê heqê tepişteyan yeno rojeve. Kadîr Kevsero tepişteye bi rayîrê telefonî keyeyê xo rê neql kerd ke rewşa înan tehluke de ya û vat: "Îşkenceyê tîya xilas nêbenê û ma wazenêvengê ma bireso çapemenî û dezgehê heqê merdiman."

 

Tepişteyê PKKyî û PAJKî 27ê teşrîna peyêne 2020 de hemverê tecrîdê Rayberê PKKyî Abdullah Ocalanî û binpaykerdişê heqê tepişteyan dest bi grevê vêşanîye yê bêdem û bidor kerdibî. Çalakîye 224 rojî yo dewam kena. Dimayê çalakî zîndanan de tewr zêde heqê tepişteyan ame binpaykerdene û pêlê îşkenceyî ame destpêkerdene. eynî wextî de tepişteyê nêweşî nênê dermankerdene, nêbenê nêweşxane û wextê yenê surgunkerdene zî şîdetî dir rî bi rî manenê."

 

'Wa dezgehê heqê merdiman vengê ma bieşnawo' 

 

Zîndanê Hûmara 2yîn ê Asayîşê Berzî ê Xarpêtî zî tepişteyî bi îşkenceyan dir rî bi rî manenê. Tepişte Kadîr Kevser bi rayîrê telefonî keyeyê xo dir qisey kerd û vat: "Rewşa ma xeylêk bi tehluke ya. Roje embazêkê ma Amed ra surgunê tîya kenê. Nê embazêkê ameyê surgunkerdene zî bi îşkenceyêko pîlî dir rî bi rî mendê û rewşa înan perîşan a. Na rewşe de hucreyê yew kesî de yenê tepiştene. Ma nêeşkenê hetkarî bikerê û nêeşkenê qisey bikerê zî. Sewbîna embazêk ma birîndar o û bi îşkenceyî dir rî bi rî mendo. La ma nika nêzanê rewşa înan senîn a. Îşkenceyê nê zîndanî nêqedêno. Ma wazenê vengê xo biresnê rayaumumî, çapemenî û dezgehê heqê merdiman. Sewbîna ma wazenê rewşa tepişteyê nêweşan bimusê û wa nêweşan bîyarê hetê ma."

 

'Bi îşkence dir rî bi rî yê'

 

Dayika Kadîrî,  Ayhan Kevser zî dîyar kerd ke semedê rewşa tepişteyan zaf bi endîşeyîn a û vat: "Teda û îşkenceyê zîndanan her ke şino zêde beno. Tepişteyî rewşêka xirab de yê. Mi xeylêk rey waştişname şawit la heta nika tu cewabêk nêameyo dayene. Ne werdêko normal danê înan, ne zî hacetêk pak danê înan. Bi îşkenceyî dir rî bi rî yê. Ma nê çî qebul nêkenê. Wa heme kesî wurzê serê lingan û wayîrê tepişteyan vejîyê."

 

‘Ma do bibî vengê înan’ 

 

Ayhane peynîya qiseykerdişê xo de nê çîyan ard ziwan ser: “No reya yewine nîyo. Çend rey vere cu zî wina îşkence bi înan kerdî û înan derb kerdî. Bêvengîya ma vera rewşa înan hîna zêde kewena tehluke. Ma do bibî vengê înan. Tena domanê mi nê, domanê ma pêro merdiman tepişte û binê zilm û îşkenceyî de yî. Na rewşe do heta kêy wina dewam bikera. Wa talebê tepişteyan bêro caardene û bine no zilmî ra bivejî. Ma do pêro werizî payan ser û bibî vengê înan.”