Oznur Deger

 

ENQERE - Cinîyan derheqê wedaritişê Pêkerdişê Stenbolî de qisey kerdî û vatî asayîşê welatijan çin o û vatî: "Denîz Poyraz partîyêke qanûnî de ronişte bî, Endama a partîye bî. La ameye kiştene. Ganî  ma AKPyî ra xelas bibê'

 

Yew destkewtişo tewr girîng ê cinîyan hemverê şîdetê camêrdan serkewtiş bi. No zî Pêkerdişê Stenbolî bi. La pêkerdiş bi qerarnameyê serekkomarî 1ê Temmuze de bi hawayêke fermî ame wedaritene. Cinîyan roja ke nîqaşê derheqê wedaritişê pêkerdişî kewt rojeve heta nika, her wareyî de têkoşîn kerdî û vatişê, 'Ma fek pêkerdişî ra vera nêdanê.'

 

'Yewin sucê Denîze, HDPyijbîyayîşê ci bi'

 

Elîf Ozdemîr: Cinî û tutî wayîrê tu heqî nêyê. Ez sey cinîyêke wextê şan de saete 00.00 de kar ra vejêna, tersena. La kes nê tersê ma nêvîneno. Ma pêrune dewaya Elmali dî. Gelo ma nê çîyan heq kenê? Ez 21 serrî ya. Wextê rayîra şina tersena, keyeyê mi terseno. Çira? Semedê Pêkerdişê Stenbolî ame wedaritene. Desteştiş û tecawuz zaf zêde bîyo. Şikdarê dewaya Elmali vera dayê. Tutê ke ganî xeyalanê xo xêz bikerê, hêrişê cinsî qal kenê. Tirkîya de çîyêk nêmend. Yewin sucê Denîz Poyraz ameye qetilkerdene, HDPyijbîyayîşê aye bi. Cinîyêke bî la HDPyije bî.

 

'Ez xo asayîş de hîs nêkena'

 

Şevval Çetîn: Ez xo komel de asayîş hîs nêkenaç Tîya ra tepya zî bawer nêkena do rewşe baş bo. Do her çî hîna xirab bo. Ganî Pêkerdişê Stenbolî bi ca biameyîne. Ez wedaritişê pêkerdişî fam nêkena. Ez kesê ke pêkerdiş bi ca nêanê fam nêkena. Komelî rê êdî qirkerdiş musnayê. Fikrê cinî û ciwanan qet esas nêno girewtene.

 

'Îqtîdarşaran ano hemverê yewbînan'

 

Zubeyde Gurcan: Pêkerdişê Stenbolî tena serê kaxidî de bi xora. Qirkerdişê cinîyan xeylêk zêde yo. Bi wedaritişê pêkerdişî zî nê meşrû kerd. Polîtîkayê ke hêz danê camêrdan estê. Wazenê ke kulturê serîtewênayîşî aver berê. Bi hawayêkê fermî zî astengîyê vernîya înan ame wedaritene. Kişeno la ceza çin o. Dewa Elmali werte de ya. Êdî bes o. Qetilkerdişê Denîz Poyraz de vatişê îqtîdarî zaf lêşin o. Semedê polîtîkayê înan ke şaran ano hemverê yewbînan esto. Hemverê ma îdareyêkê dişminê cinî, kede esto.

 

'Ganî ma hesap pers bikerê'

 

Ozge Tekîn: Kiştişê cinîyan welatê ma de zaf zêde bîyo. Dimayê pêkerdişî do hîna zêde bê. Endîşeyê ma no yo. Bi têkoşînê cinîyan hêvîdar a do game peyser bierzê. Denîze endama partîyêke qanûnî bî, embaza ma bî û ameye qetilkerdene. Bêşik ma do nê hesabî pers bikerê. Ganî ma têkoşîn girs bikerê û hesap pers bikerê.

 

'Ganî cinî pawitişê cewherî bimusê'

 

Gulnur Narîn: Pêkerdişêk ame kerdene la bi ca nêame. Vernîya pêkerdişî zî dimayê pêkerdişî zî hêrişê hemverê cinîyan dewam keno. Ganî cezayê hîn giran biameyîne dayene. Her roje cinî yenê qetilkerdene. Ganî pawitişê cewherî cinîyan rê bêro musnayene. Ganî hemverê camêrdê ke şîdet kenê pawitiş bêro kerdene.

 

‘Ez tîya ra tepya nêzana do se bibo'

 

Pinar Ataç: Kiştişê cinîyan zêde benê. Tîya ra tepya zî do wina dewam bikero. Camêrdê ke şîdet û tacîz dewam kenê, ceza nêgê û reyna eynî sucî kenê. Semedê nê do rewşe tewr zêde xirab bo. Ez tîya ra tepya nêzana ke do se bibo.

 

'Ganî ma AKP ra xelas bibê'

 

Hamiyet Gezgîn: Pêwa pêkerdişê Stenbolî bi seyan cinî ameyî kiştene. Do dimayê feshkerdişî do se bibo gelo? Cinîyan bê îtîbar kerdî. Semedê asayîşê cinîyan, ganî pêkerdiş nêameyîne wedaritene. Cînayetê cinîyan qetî sîyasî yê. Prosesê pandemî nêeşkayîne baş îdare bikerê. Ganî weçînayîş bibo û ma AKPyî ra xelas bibê. Qetilkerdişê Denîz Poyraz ma zaf zêde xemgîn kerd. Îdarekarê nê welatî nêeşkenê îdare bikerê û ver bi kaosî de benê. Ganî ma vera nê vengê xo berz bikerê.

 

‘Ez semedê cuya xo endîşeyîn a'

 

Welatîyêke nameyê xo nêda: "Tehluke roj bi roje zêde beno. Verê zî wina bi gelo? Yan zî demê peyînan de ma pêhesênê coka. Ez zaf bi endîşeyîn a. Problemî her ke şinê zêde benê. Ez mamoste ya û keyeyê wendekaranê xo ra zî vana. Pêkerdişê Stenbolî bi hawayêke cidî cinîyan pawitine. La ez nika endîşeyîn a ke gelo do kuçe de çîyêk bêro sereyê mi. Eke çîyêk bêro sereyê mi ez wazena mi teslîmê keyeyê mi bikerê. Tirkîya de rewşa cinîyan wina ya.