Sema Çaglak

 

AMED - Akademîya Ma Muzîkî semedê akerdişê wendegehê Zarok Ma, do 10ê temmuze de konserêk organîze bikero. Mamosteya Ma Muzîkî Evîndare vengdayîşê tewrbîyayîşê konserî kerd û vat: "Akerdişê wendegehî xeyalêk ma bi û ma xeyalanê xo bi ca anê. Semedê derûdor û tutanê nê welatî çîyêko pîroz o."

 

Akademîya Ma Muzîkî ke serra 2017ine de Amed de bi sloganê, "Semedê her kesî muzîk her ca muzîk" startê xebatanê xo da, bi projeyê newe yê derheqê muzîkî de xebatê xo dewam keno. Akademîya ke bi Orkestrayê Ahengê Xozayî ya MA'yî, Orkestrayê Tutan ê MA'yî, Orkestraya Cinîyan ê MA'yî û Orkestraya MA'yî semedê muzîkê adetê kurdkî mohrê xo binê xebatê serkewte da piro, nika zî semedê perwerdeyîyê tutê 0 û 5 serre wendegehê Zarok Ma akeno.

 

Akademîya Ma Muzîkî, semedê awankerdişê wendegehê Zarok Mayî 5ê sibate de serê keyepelê fongogoyî de bi amancê 220 hezar lîra kom bikero, kampanyaya hetkarî dabi destpêkerdene û dimayê demêk resabi hedefê xo. Nika zî Akademîya Ma Muzîkî do semedê akerdişê wendegehê Zarok Mayî 10ê temmuze de konserêk bido. Derheqê babete de Mamosteyê Akademîya Ma Muzîkî Evîndar Dûlek qisey kerd.

 

'Xeyalêk ma bi û ma xeyalê xo bi ca anê'

 

Evîndare destpêkê qiseykerdişê xo de dîyar kerd ke semedê projeyê Zarok Ma paştdayîş û kedêke bi erj virazya û vat: "Bêşik prosesê viraştişê Zarok Ma'yî her çiqas bi kelacan bo zî hende zehmet bi.  Prosesê karê înşaatî zehmet bi. Tewr peyîn zî nika ver bi qedênayîşî yo. Ma hewl danê ke bireso 6ê Temmuze. Xeyalêk ma bi û ma xeyalanê xo bi ca anê. Semedê tutançîyêko pîroz o. Meraqê tutan serê wendegehî de zaf esto û erje zî danê. Pabeyêk baş vera Zarok Ma esto. Ma zî vanê hema ma leze biqedênê û ma do tutan keyeyê înan ê diyîn de bivînê."

 

'10ê temmuze de do konserêk bidê'

 

Evîndare  dewam de wina vat: "Xora ma semedê Zarok Mayî fikiryayîne konserêk pîl bidê. Eynî wextî de hîn konserê Amîda zî dewam kenê. Semedê konserê akerdişê Zarok Ma yî zî ma do Orkestraya Mayî vejê sehne. Xora vernîya aşmêke ma dest bi amadekarîyê xo kerdibi. Weş derbaz beno û ma bi kelecan ê."

 

'Konser do bi bîlet bo'

 

Evîndare semedê bêîmkanîyê ekonomî do konser bi bîlet bo û vat: "Ma waşt konser yew bo. Eke 2 hebî bibayîne manaya ci nêmendêne. Coka ma waşt 10ê temmuze de bo. 6ê temmuze de ma do spasîyê xo semedê paştdayîşî bikerê û keyeyanê xo nas bikerê. Wa a roje biba roja tutan. La semedê konserê 10ê menge zî amadekarîyê ma dewam ê. Konser do bi bîlet virazyo. Semedê xeylêk çî ma kêm mend. Ma zaf waştêne bêpere konserêk bidê la çi heyf, semedê bêîmkanîyê ekonomîye ma do konser bi bîlet bidê. Kesê ke wazenê bîlet bigêrî, eşkenê xo biresnê serê keyepelê ma û cayê akademî."

 

Evîndare wina qedêna: "Ma semedê paştdayîşî, destpêk ra heta peynî spasîyê xo pêşkêş kenê û ma vanê, ma pîya pîl bibê."