Medya Uren

 

MÊRDÎN - Tepişteyo sîyasî yo nêweş bi nameyê Remzî Çaglim 4 hewte xebere ci ra nêna girewtene. Cinîya Remzî, Sitî Çaglim endîşeyê xo pare kerd û vat, lezabez ma biresnê ey.

 

Her ke şino tecrîdê serê tepişteyê sîyasî zêde beno. Bi taybetî zî tepişteyo nêweş nêno tedawîkerdene û heqê înan yeno binpaykerdene. Remzî Çaglim zîndanê Mêrdînî yê tîpê E yî de serrêke û 7 mengî yo yeno tepiştene. No 4 hewteyo zî xebere ci ra nêna girewtene. Keyeyê tepişteyo sîyasî Remzî, semedê gumanê serê ci de xo resnayî ajansê ma û veng da selahîyetdaran.

 

'Ma xebere ci ra nêgînê'

 

Cinîya Remzî, Sitî nê zanayîşî pare kerd: "Pêvînayîşê bi telefonî dir her hewte virazyayîne. Labelê bi 4 hewte bi bahaneyê şubeyê koronoyî ma pêvînayîşê bi telefonî nêkenê. Şubeyê koronoyî tewr zêde 15 rojî dewam keno, no beno mengêke. Ma zîndan de gêrenê vanê, 'Remzî mi û to ra başêr o.' Madem ke baş o çira ma nêeşkenê pêvînayîş bikerê? Bi 4 hewte yo, zerrîya ma veşena."

 

'Nêweşîyê giranî ey dir estê'

 

Sitiye dîyar kerd ke nêweşîyê Remzî estê û vat: "Vernîya ke Remzî bêro tepiştene zî nêweşîyê ey giranî estê. Gonî eştêne, qelbê ey qul bi û nêweşîya ey yê şekirî estbî. Xora rewşa normal de lazim o nêno girewtene. Hetê tedawî de zî îdareyê zîndanî nêbeno hetkar. Ma zaf tersenê. Tutê mi endîşeyan ra nêeşkenê nan biwerê. Çîyo ke ma rê yeno kerdene zulm o. Ma veng danê selahîyetdaran û yê ke çîyêk destê înan ra yeno, bikerê. Wa ganî bibê vengê Remzî. Ma rewşa ci ra bi guman ê."