Medya Uren 

 

MÊRDÎN - Cinîyê ke dewa Mêrdînî de karê ramitişî, citkarî û pesdewarî kenê, bale antî serê zehmetîyê ke vînenê û wina vatî: "Karê dewan her wext zor o. Labelê krîzê ekonomî tesîr serê ma de kerd û rewşa ma hîna zehmet bî. Ma şefeq ra heta mexrîb nê karî kenê. Zehmet o labelê ma paştdayîşê mîyanê xo de kêfweş benê."

 

Şaristanê Mêrdînî; wareyê ramitişî, citkarî û pesdewarî de wayîrê tarîxêk kan o. Cinîyan tarîx ra heta nika nê warî de kedêke pîl dayê û hema zî danê. Cinîyê dewa Mêrdînî ke bi karê ramitişî, citkarî û pesdewarî dir eleqedar benê û nê adetî dewam kenê, ajansê ma rê qisey kerdî.

 

'Ma cinî tewr zehmetîyan ancenê'

 

Zubeyde Andaş serê erdê xo de semedê weykerdişê heywanan, paleyî kena. Zubeyde ma rê wina qal kerd: "Nika makîne vejîyayê û no kar hîna asan bîyo. Verê heta genim ameyîne keye, ma tewr zehmetî dîne. La nika nê zehmetî yew bi yewe kêm bîyê. Pêwa nê zî ma zehmetîyan vînenê. Semedê baro tewr giran serê milê ma de yo. Taybetî zî ma cinî tewr zêde zehmetî ancenê."

 

'Cinîyan kedêke pîl dayîne' 

 

Zubeyde dewam de wina vat: "Genimê ma nê çaxan de riseno. Semedê ma tena weykerdişê heywanan ramenê, tay o. Ma semedê zimistanî heywananê xo rê wedarnenê. Eke vewre zêde bo ma tebera zî simer û cew gênê. Ê ma qîmê heywanan nêkeno. dimayê ke ma genim arêdanê, ma dima ra danê patose ro. Verê ma bi heywanan werdi kerdêne. Genim hetêk ra simer hetik ra şîne. Dima ra ma geni berdêne areye û ma simer zî kerdêne telîsan. Sey nika telîsî çinbî, ma bi destê xo deştêne. Heta ma karê xo qedênayîne ma zehmetîyêk pîl ciwîyayîne. Cinîyan kedêke pîl dayîne."

 

'Krîzê ekonomî tesîr serê ma de kerd'

 

Bêrîvan Andaşe zî wina vat: "Ma sey ciwanê zî nê karî zor vînenê. La sey maya ma ya Zubeyde vana verê hîna zehmet bîyo. La hema zî nêzdbîyayîşê ma kêm nêbîyo. Ma reyna yenê têhet. Ma yewbînan rê benê hetkar, dej û kêfweşî xo pare kenê. Ma nê prosesê krîz û pandemî ra tesîr bî. Ma nêeşkenê debara xo zî bikerê. Ma reyna muhtacê şaristanî benê. Ma bi nê ramitîşî dir zî nêeşkenê debara xo bikerê. Emsar semedê varan tay vara, genim zî kêm bi. Ma pêro zirar de yê."