Sema Çaglak 

 

ÊLIH - Nedret Dun bi pewtişê nanê tewqe hem adetê xo pawena, hem zî debara keyeyê xo kena. Nedrete dîyar kerd ke eke cinî biwazo eşkena her hetê cuye de serkewte bibo û semedê aye zî qerardayîş girîng o.

 

Cinî serdemê tewr kan ra heta ewro bi keda destê xo komel rayîra bena. Nînan ra yew zî nanê tewqe yo. Sewbîna cinîyî hemverê cinsperestî zî vejênê û nînan ra yewe zî Nedret Dun ke 45 serrî ya. Nedrete bi viraştişê nanê tewqe debara keyeyê xo kena.

 

 'Mi fek waştişê xo ra vera nêda'

 

Nedrete 4 serrî verê qerar dana û kûçeyêkê Êlihî de dikanêk akena. Nedrete destpêkê qiseykerdişê xo de wina qalê akerdişê dikanê xo kerd: "O wext destê mi de tu kar çinbi. Îmkanê ma yê ekonomî zî xira bî. Mêrdeyê mi zî nêeşkayîne karêk bivîno. Rewşa ma her ke şîne xira bîne. Coka mi zî qerar da ke ez bixebitî. Mi nanê tewqe weş viraştêne û mi viraştişî ra zî hes kerdêne. Coka mi dest bi nê karî kerd. Destpêk de helbet nêzdîbîyayîşê komelî yê hemverê xebata mi virazya. Labelê mi reyna fek waştişê xo ra vera nêda û hema zî serê karê xo de ya."

 

 'Bi pandemî dir karê cinîyan tewr zehmet bi'

 

Nedrete, dîyar kerd ke semedê pandemî karê înan xeylêk xirab bîyo û vat: "Vernêya pandemî de karê mi baş şîne, la bi pandemî dir mi zirarêk pîl kerd û nika zî sererast nêbîyo. Xora cinî kêm eşkenê xebityê. Bi pandemî û krîzê ekonomî dir tewr zêde karê cinîyan zehmet bi. Xeylêk esnafê cinî verê xo dayî keye. Semedê xebata cinîyan ganî hîna zaf paştdayîş bêro dayene."

 

 'Dem serdemê cinîyan o'

 

Nedrete, tewr peyîn wina bale ant serê têkoşînê cinîyan û vat: "Êdî xeylêk cinî heqê xo de eşkenê vejîyê û eke biwazê eşkenê bi her hawayî serkewte bibê. Ez wazena hûmara esnafê cinîyan zêde bibo. Ganî cinî hewceyê tu kesî nêbê. Semedê cinîyan tena cesaret lazim o. Êdî dem serdemê cinîyan o. Wa cinî xo bindest nêkerê. Eke nê serdemî de cinî serê linganê xo de nêvinderê do vinî bikerê. Çi beno wa bibo, ganî cinî bieşkko serkewte bibo."