Sema Çaglak - Şehrîban Aslan 

 

AMED - Wendekar Şevîn Ektî Farqînê Amedî de ciwîyena, semedê weykerdiş û tedawîkerdişê heywanan 4 serrî yo mîyanê xebate de ya. Şevîne wina qalê xebate xo kerd: "Xeylêk heywanî bi îşkence û hêrişan dir rî bi rî manenê, eke semedê pawitişê heqê heywanan qanûnî bibê û bêrê caardene do xeylêk vurnayîşî bêrê meydan.”

 

Hemverê teda, îşkence û îstîsmarê hemverê heywanan heta nika qanûnêkê pawitişî nêameyo vetene. Semedê nê zî heywanî bi hêrişanê wehşî dir rî bi rî manenê û hêrişkerî zî nênê cezakerdene. Kes, rêxistin, kom û tevgerê heqê heywanan pawenê, goreyê îmkananê xo hewl danê wayîrê heywanan vejîyê, la xeylêk rey hetê komelî ra yenê mexdûrkerdene. La reyna zî bi kampanya û hewldayîşê xo semedê heywanan pawenê, xebate kenê. Nînan ra yewe zî wendekare Şevîn Ektî ya.

 

4 serrî yo heywanan wey kena

 

Şevîne Farqînê Amedî de ciwîyena û 4 serrî yo werd dana heywanan. Şevîne wina qal kerd: “Lazimîyê bi hezaran heywanan bi werd, dermankerdiş û pawitişî esto. Sewbîna xeylêk heywanî semedê ke stargehêkê înan çin o, mirenê û xeylêk heywanî zî semedê hawayê serdinî mirenê. Na rewşa heywanan wina kerd ke semedê înan çîyêk bikerî. Cuyêka weş semedê înan zî heqêkê sereyîn o. Mi heta nika semedê înan têkoşîn kerdo, ez o tîya ra tepya zî bikerî.”

 

‘Xeylêk heywanî îşkence dir rî bi rî manenê’

 

Şevîne vat, xeylêk heywanî bi teda û îşkence dir rî bi rî manenê û vat: “Semedê qanûnêk heqê heywanan bipawo çin o, her roje xeylêk heywanî bi îşkenceyan dir rî bi rî manenê û tecawuzê heywanan kenê. Semedê hişmendîyê komelî zî tedayêk serê heywanan de esto û ezîyet bi înan kenê. Farqînê 3 heywanî rastê tecawuzî ameyî, la tecawizkerî nêameyî cezakerdene. Ma înan zanê la mimkûn o ke xeylêk serebûtê nê şiklî bibê.”

 

‘Kutikanê qijan erzenê çop’

 

Şevîne dîyar kerd, kutikanê qijan erzenê çop û vat: “Vanê qey cayê çopî semedê heywanan xilasbîyayîş o la eksê ci tu wext nêbîyo cayê xilasbîyayîşê. Xeylêk heywanî mîyanê ê çopan de mirenê. Dewlete ê heywanan mîyanê çopî de verdena. Semedê ke dewlete pawitişê înan nêkena ma zî înan rê stargehêk viraşt. Sewbîna ma do xeylêk stargehê qijan zî viraznê. Ma di hebî zî îstasyonê werdî viraşt.”

 

Vengdayîşê paştdayîşî..

 

Şevîne wina qiseykerdişê xo qedêna: "Xeylêk kesê erjîyaye zî paştdayîş dayî. Sewbîna Zarok TV zî paştdayîş da xebatanê ma. Labelê lazimîyê ma tewr zêde paştdayîş esto. Ganî pêro kesî nê ra bi hîs nêzdî bibê û paştdayîş girs bikerê.”