AMED - Roniştişê dewaya Rojnamegere Hatîce Şahîn a bi iddiayê faliyetê KCDyî kerda de 15 serran bi cezaya zîndanî yena muhakemekerdene.

 

Muxabira rojnameya Yenî Yaşamî Hatîce Şahîn ke çarçewaya cipersayîşê serê Kongreya Komela Demokratîke (KCD) 18ê teşrîna verêne 2018 de amebî destbendkerdene û dima ra ameye veradayene bi îdiayê “endamîya rêxistine” yenê muhakemekerdene. Roniştişê 3in ê dewaya Hatîce 9in Dadgeha Cezaya Giran ya Amedî de ame vînayene. Derheqê Hatîce Şahîn de heta 15 serran cezaya zîndanî yena waştene.

 

Hatîce û avûkatê xo Resûl Temûr roniştiş de amade bî. Resûlî waşt ke dewa bêro betalkerdene û qerarê beraetî bêro dayene. Heyetê dadgehe semedê temamkerdişê muhtewayê dosya, roniştiş  taloqê 11ê teşrîna verêne kerd.