ÎZMÎR - Cinîyan dîyar kerdî ke qetilkerdişê Denîz Poyraze hêrişê vera HDPyî de, mesajêkê semedê Kurdan, cinî û rayaumumî ra vengdayîşê pîlkerdişê têkoşînê yewbîyayîşî kerdî.

 

Hêrişê hemverê HDPyî yê Îzmîrî de faşîst Onur Gencer, Denîz Poyraz qetil kerd û reaksîyonê vera ci her ke şino zêde benê. Hema hema her roje çalakî û bername yenê kerdene û reaksîyonê vera qirkerdişî yenê dîyarkerdene. Cinîyan ajansê ma rê qisey kerdî û vatî, bi nê hêrişî dir mesaj dayê Kurdan, cinî û rayaumûmî yê demokratîke û vatî ganî têkoşînê yewbîyaye pîl bibo.

 

'Suîkast dewamê planê vinîkerdişê 2014ine yo'

 

Aktîvîsta Tevgerê Cinîyan ê Azadan (TJA) Nur Aytemûr dîyar kerd, çîyê ke yenê ciwîyayîş dewamê ‘planê vinîkerdişî’ yê 2014ine de kombîyayîşê Heyetê Asayîşê Netewî (MGK) de ameyo girewtişî yo û dimayê prosesê aştîye xira bîyo, polîtîkayê şerî yê serê Kurdan dewam kerdê û vat: "AKP zî lingê nê yê sîyasî yê. Têkilîyê înan yê bi hêzê paramîlîter dir hende vejîyayo sewîyeya berz. Bi taybetî hîsê  welat û netewî sûr kenê û bi polîtîkayê dişminî vera Kurdan hêriş kenê. Ma nê qirkerdişî bi mengan verê bi kampanyaya ‘ma xo pawenê' de tespît kerdibi. Wextê ma vatêne 'ma xo pawenê' de ma nê vatêne. Ma qiseykerdişê ziwanê xo, bi wayîrvejîyayîşê hêzê rêxistinbîyayîşê xo pawenê. Kampanya hema dewam kena."

 

'Hêriş mesajê semedê cinîyan o'

 

Endama Meclîsê Cinîyan ê Sosyalîstan (SKM) ya MYKyîÇîçek Otlu zî vat, hêrişê hemverê HDPyî vera pêro kesê demokratîkan o û vat: "No nîşaneyê krîzê ke AKP û MHP nêeşkeno îdare bikero yo. Lîderê çeteyî bi paştdayîşê dewlete Sedat Pekerî kiştişê kiştoxênêdîyar û tecawuzê vera cinîyan vat. No polîtîkayê sîstemê yê camêrdan ê hemverê cinîyan o. Ma no polîtîkayî qetilkerdişê Sakîneyan, Sêvê, Pakîze, qirkerdişê Pirsûs-Enqereyî de dî. Şexsê Denîz Poyraz de mesajê 'Şima çiqas vajê, ma bêveng nêmanenê, ma nêtersenê, ma do şima qetil bikerê' danê."

 

'Ganî têkoşînê topyekun bibo'

 

Paştdayîşê Morî ra Denîz Uslu zî wina vat: "Pêwa ke cinî bi desan rey hêzê asayîşê muracat kenê, nênê pawitene. Tedbîrê lazimî nênê girewteneû tewr peyîn yenê qetilkerdene. Denîze hetê kesêk çekdar ke keweno bînaya ke her wext binê muşahadeyî de ya û yena qetilkerdene. Hêrişê hemverê HDPyî netîceyê polîtîkayê hukmatî yê. No kiştişêk organîzekerde yo. Her roje cinî yenê qetilkerdene. Eke ma vera şîdetê camêrd-dewlete bi topyekun tênêgeyrê, ma do bi tabloyêk tewr sîya dir bêrê rî bi rî."

 

'Hêrişê hemverê HDPyî hemverê cinîyan ameyo kerdene' 

 

Rêxstinê Partîya Keskan û Sol Gelecek Nevîn Aytekîn zî reaksîyon vera qirkerdişî da û vat: "Ma bi endîşeyîn ê ke sey kiştoxê bîn yê cinîyan, ceza semedê şikdar Onur Gencer zî nêro dayene. Hêrişê hemverê HDPyî hêrişê vera cinîyan o. HDP partîyêka cinîyan a û xora hemverê HDPyî zî kampanyayêk esta. Tena hemverê HDPyî ney, hemverê azadîya heme şaran o. Xora HDP hedefê dewlete de yo. Ganî ma zîbibê yew û pîya têkoşîn bikerê."

 

'No suîkasto yewin nêyo'

 

Meclîsê Cinîyan ê Hûmara 2 yê Egîtîm Senî yê  Îzmîrî ra Ebru Dînçel zî wina vat: "Têkiliyê dewlete-mafya, sîyaset-çapemenî bi îfşayê Sedat Peker ney, bi qezaya Susurlukî vejîya teber. Hemverê feshkerdişê Pêkerdişê Stenbolî, pankartêkê nameyê cinîyê ke 3 mengan de ameyê qetilkerdene nuştebî, amebi daliqnayene. Nameyê 88 cinîyan ci de bi. Pey pankartî de cam bi guleyan ame şikinayene û çi heyf nameyê Denîze bi guleyan o pankartî de ame nuştene."