RIHA - Emîne û Ferît Şenyayar yê ke gêrayîşê "edaletî" dewam kenê, fotografê xo yê Omer Faruk Gergerlîoglu ke parlamenterê HDPyî bi û dima ra parlamenterîya ey ameye fistene û ame tepiştene pare kerd. Emîne û Ferît parekerdişê xo yê binê fotografî de wina vatî, "Kesê ke heq, huqûq û edalet wazenê tena meverdê."

 

Keyeyê Şenyaşarî ke hîrê kesî hetê merdimê AKPyijan ra ameyî kiştene û kesêk kesêk keyeyî ra tepişte yo, bi waştişê “edaletî” 111 rojî yo verê Edliyeyê Rihayî de çalakîya nobete kenê. Emîne Şenyaşar û lajê ci Ferît Şenyaşar, çalakîya xo ya 5 rojî mîyanê hewteyî de verê Edliyeyê Rihayî de kenê, peynîya hewteyî de zî keyeyê xo de dewam kenê. Keye ewro zî sey her peynîya hewteyî, nobeta xo keye de dewam keno. 

 

Keyeyî serê hesabê xo ya medyaya dijîtalî de fotografêk xo yê bi Omer Farûk Gergerlîgolû ke parlamenterîya ci ameye fistene û dima ra ame tepiştene antibî pare kerd û vat: "Kesê ke heq, huqûq û edalet wazenê tena meverdê." Dewamê parekerdişî de no mesaj ame dayene: "No welatî de heta ke şar ‘zana û birêxistinkerde nêbo', DEWLETA HUQÛQ bi hawayêk rast nêna awankerdene, sey şarî do her wext zulm û nêheqî bêro kerdene. Hemverê zulmî bêveng memanê! Merdimayî nê çî wazena..."