Rojda Aydin

 

SÊRT - Dayîka hunermendê herêmî Metîn Kiliçaslanî Şemzêxane reaksîyon vera tehlîyenêkerdişê Metînî da û vat: "Ganî lajê mi serbest biameyîne veradayene, semedê ke êdî cezaya xo temam kerda." Vîyan û Jîyan zî vengdayîşê serbest veradayîşê pîyê xo kerdî û wina vatî: "Ma nêwazenê bê pîyê xo pîl bibê."

 

Hemverê tepişteyê sîyasîyan bi serran o polîtîkayê taybetî yenê kerdene. Cezaya dîsîplînî, dergkerdişê ceza, nêzdîbîyayîşê kêyfî yê zîndanan û bêhuqûqîyê edaletî temamê heqê tepişteyan binpay keno. Nînan ra yew zî tepişteyo bi nameyê Metîn Kiliçaslan o. Metîn  5ê hezîrana 2015 ra tepişte yo. Metîno ke bi 6 serrî yo tepişte yo û nika Zîndanê Bandirmayî Hûmara 1ê Tîpê Tyê de yeno tepiştene. Metîn, hunermendêk herêmî yo û dawetan de deyîran vatêne. Bi sebebê ke tewrê Newroze û mîtîngê Partîya Demokratîke ya Şaran (HDP) bîyo, derheqê ey de îdianame ame amadekerdene. Dadgeha Cezaya Giran ya Sêrtî de 12 serrî ceza ci rê ameye dayene. Dimayê îtirazê avûkatî ceza ameye fistene. La qiseykerdişê bi telefonî kerdî sebeb û 7 serrî û nîm ceza dayî ci. Avûkatî derheqê ceza de muracatê Dadgeha Berze kerd la heta ewro zî tu cewabêk nêameyo dayene. Ganî 15ê nîsana 2021 de bi hawayêke kontrolê şertî biameyîne tehlîyekerdene. Derheqê babete de dayîka Metînî, Şemsêxan Kiliçaslan qisey kerd û vengdayîşê serbestveradayîşî lajê xo kerd.

 

Govende sey 'şîfreyê rêxistine' bi name kerdî

 

Şemsêxane, destpêkê qiseykerdişê xo de bal eant serê sebebê tepiştişê lajê xo û vat: "Lajê mi hunermendê herêmî bi. Govendan de deyîran vatêne. Rojêke reyna şi govende û telefon de bi embazêkê xo dir qisey kerdo. Qiseykerdişê xo de vato, ‘taxa ma de veyve esta, ez uca de ya.' No vatiş sebebê sucî ame vînayene. Dadgehe vatişê ke telefon de ameyê kerdene sey, ‘şîfreyê rêxistine' dî. Tu delîl  dosya ey de çin o. Tena no qiseykerdiş esto. Lajê mi 9 mengî zîndan de mend û dimayê mengêke reyke bîn bi bahaneyê ‘ti do şêrê ko' ame tepiştene. 6 serrî yo lajê mi tepişte yo. Lajê mi zîndanê Sêrtî de bi û ey surgunê zîndanê Bandirmayî kerdî û bi 4 serrî yo zî uca de yo."

 

'Ganî 3 mengî vernîya nika biameyîne veradayene'

 

Şemsêxane dewam de wina vat: "Ganî lajê mi bêro veradayene, semedê cezaya xo temam kerda. Derheqê serbestveradayîşî de ma waştişname Dadgeha Bilind rê şawit. Vatî hema cigêrayîş yeno kerdene. Bi 3 mengî yo lajê mi hema nêameyo tehlîyekerdene. Ma hema bendeyê qerarî yê. Sewbîna semedê pandemî bi 2 serrî yo ma nêeşkenê şêrê pêvînayîş zî. Vernîya ey zî semedê ma vat do bêro tehlîyekerdene, ma nêşî. Pêroyî de ma bi 3 serrî yo ma ey nêdîyo. Sewbîna lajê mi mîdeyê xo ra nêweş o û semedê tedawî nêbenê nêweşxane zî. Ez waştişê veradayîşê lajê xo kena."

 

'Ma nêwazenê bê pîyê xo pîl bibê'

 

Vîyana 7 serrî û Jîyana 5 serrî zî waştişê veradayîşê pîyê xo kerdî û vatî: "Ma xeylêk vîrîye pîyê xo kerda. Pîyê mi vera bidê. Ma nêwezanê bê pîyê xo ma pîl bibê."