XARPÊT- Erdlerzo ke hêzê ci 5,3 yê qezaya Depî de ame meydan, kesî dinyaya xo nêbedilna la hîn keye û axurê dewe xesar dî.

 

Qezeya Depî ya Xarpêtî de vizêr şan de saete 21,28 de hêzê ci 5,3 erd lerza. Erdlerz sere de Amed, Êlih, Mêrdîn, Sêrt, Erzirom, Xarpêt û xeylêk cayan de ame hîskerdene.

 

Welatijan şewe teber de derbaz kerdî

 

Dimayê erdlerzî, welatijê Xarpêt, Çewlîk û qezayê derûdorî vejîyayî teber. Ame dîyarkerdene ke semedê erdlerzî hîn keye û axurê dewe Kuşbayiri, Çelebî, Yeşîlbelen, Sarihan û Çan yê girêdayê qezaya Depî xira bî û zirar dî.

 

Welatijê ke keyeyê înan xesar dî, şewa xo teber de derbaz kerdî. Ame zanayîş ke erdlerz de tu kesêk dinyaya xo nêbedilanyo la herême de dimayê erdlerzî xeylêk erdlerzê qijî bîyê.