Mizgîn Marînos - Selma Aka

 

MEXMÛR - Endama Komîteya Jineolojî ya Mexmûrî Marya Bozan, qetilkerdişê endama HDPyî Denîz Poyraz şermezar kerd û vat: "Ganî ma hemberê prosesî de hêzê xo tewr zêde vejê vernî. Paştdayîşê erjê xo bikerê û hemverê hêrişanê topyekun yê qirkerdişî yê serê herra xo de vengê xo berz bikerê."

 

Hemverê qetilkerdişê endama Partîya Demokratîke ya Şaran (HDP) ya Îzmîrî Denîz Poyraz de reaksîyonî dewam kenê û hêrişê vera Herêma Federal a Kurdistanî de zî rojeve de yo. Hemverê hêriş û qetilkerdişî de xeylêk derûdor bi çalakî û eşkerayîyan helwestê xo ramojna. Endama Komîteya Jineolojî ya Wargehê multecîyan ê Şehîd Rustem Cûdî (Mexmûr) Marya Bozan derheqê qetilkerdişê Denîze û hêrişê herême ser o ajansê ma rê qisey kerde.

 

'Startê hêrişan ame dayene'

 

Marya, destpêkê qiseykerdişê xo de bale ant serê qetilkerdişê Denîz Poyraz û vat: "Ma qetilkerdişê Denîz Poyraz şermezar kenê. Dewleta tirkî ewro bi rayberîya AKP-MHP hêrişêk xidar û topyekun vera şarê Kurdî kena. Hêrişê serê bînaya HDPyî ya Îzmîrî zî nimûneyê nê yo. Hukmatê AKP-MHPyî vakurê Kurdistanî de wazeno şexsê HDPyî de îradeyê şarê Kurdî çin bikero, no çî destpêkê bi tepiştişê heme îdarekar û xebatkarê partîye dir dest pêkerd û heta qetilkerdişê Denîz Poyraz ame. Ma eşkenê vajê ke hêrişê hemverê HDPyî û qetilkerdişê Denîz Poyraz start dayîşê hêrişê hemverê şarê kurdî yo. Ma baş zanê ke o keso ke qetlîam kerd, kesêk rêze ra nêyo. Kiştox bi serran o, hetê AKP-MHPyî ra ameyo perwerdekerdene. Bi seyan kesê bînî sey ey ameyê perwerdekerdiş zî estê."

 

'Hemverê îrade û bîyayîşê cinîyan de hêrişî yenê kerdene'

 

Marya wina dewam  kerd: "Tirkîya de tewr zêde cinî bi hêrişan dir rî bi rî manenê. Hemverê îrade û bîyayîşê cinîyan de hêrişî yenê kerdene. Her roje cinî bi qirkerdişî dir rî bi rî manena. Dewlete êdî nê çî bi hawayêkê akerde kena. Îqtîdar kiştoxan paweno û vera cezakerdişî înan xelate keno. Ma baş zanê ke yê ke eşkeno sîstem bivurno,  cinî yê. Hemverê sîstemê qirkerdişê  AKPyî de cinî vindena. Qanûnê Tirkîya de cinî nêna pawitene. Semedê nê tehlukeyan ganî cinî hetê xopawitişî de xo perwerde bikera û rêxistinê xo xurt bikera."

 

'Hemverê hêrişan bêveng memanê'

 

Marya, tewr peyîn vengdayîşê wayîrvejîyayîşê HDPyî kerd û vat: "Ma sey şarê Kurdî û sey komelêk azadîwaştox hemverê nê hêrişan bêveng nêmanê û reaksîyonê xo ramojnê. Semedê HDP îradeyê ma yo, HDP temsîliyetê şarê azadîwaştoxan keno, bîyayîş û pawitişê ma keno. Ganî ma nê prosesî de hêzê xo tewr zêde vejê vernî. Paştdayîşê erjanê xo bikerê û hemverê hêrişê topyekun yê qirkerdişê serê herra xo de vengê xo berz bikerê."