Gulîstan Azak

 

 AMED - Emîne Karakaş hetê camêrdê bi nameyê Aslan Karakaş ra ameye qetilkerdene û balkêşo ke qetilkerdiş de polîsan ra bigî heta xebatkarê weşîye, madeyê îhmalî bale anceno. Dayîka Emîne, Nurcan Karakaş zî vat: "Ez bi mengan verê nêweşxane de menda. Mi hewl da ke ez çîyê ke ameyê sereyê mi bidî eşnawitiş. La her kes ker, lal û kor mend. Ez bi mengan tena menda. Kesî destê mi nêgirewt."

 

Qezaya Bismilî ya Amedî 4ê sibate de camêrdo bi nameyê Aslan Karataş (34) merdima xo Emîne Karakaş (16) ke serrêke bi ke ci rê tehdîd û tacîz kerdêne ke ci dir bizewicyo, bi çek giranî birîndar kerd. Emîne Nêweşxaneyê Fakulteya Tipê ya Unîversîteya Dîcleyî ya Amedî de beşê giran de ameyîne dermankerdene û 138 rojî dima dinyaya xo bedilnaye. La şikdar Aslan Karataş hema zî nêameyo destbendkerdene.

 

Cenazeya Emîne semedê tehdîdê keyeyê şikdarî, hetê dayîke ci Nurcan Karataş dewa ve Tepekoyî ya Bismilî ameye definkerdene û ame îdiakerdene ke sebebê ke şikdar nêno destbednkerdene, oyo ke keyeyê ci bi serran o qorîcîtî kerdê û dewlete keye pawena.

 

'Îhmalê doktoran zî esto'

 

Heto bîn ra derheqê qetilkerdişê Emîne Karataş de îhmalê nêweşxaneyî ke ci de ameyîne dermankerdiş yeno mojnayene. Goreyê îdiayê keyeyî Emîne nêweşxaneyê ke ameyîne dermankerdene de menga gulane hewteyê ewilî de gonî herikyaya mezgê aye û dimayê hewteyan netîceyê Dîmenê Manyetîk Rezonans (MRG) de vejîyayo werte.

 

Dayîke Nurcan Karakaş çîyê ke ciwîyaya wina qal kerd: "Îhmalê doktorê nêweşxane bi sebebê merdişê Emîneye. Doktoran sûc qebûl nêkerdî û bi vatişê sey ‘rewşa kêanaya to xora baş nêbî, sey merdeyan bî' xo pawitî."

 

‘Dozgerî cipersayîşê lazimî nêkena'

 

Nurcane dewam de wina vat: "Roja ke serebût qewimya, ma dozgerî nêdî. Dimayê ke Emîne dinyaya xo bedilnaye, semedê raporê merdişî amade bikero ame nêweşxane. Aslan Karakaş yeno nimtene û pawitene. Paşta ey saxlem a û heta nika ganî rew biameyîne destbendkerdene. Keyeyê ey bi serran qorîcîtî kerd, çekê ke dîyyaî înan, xeylêk kesî ameyî kiştene. Goreyê zanayîşî coka qorîcîtî ra ameyê dûrfistene. Dimayê kênaya mi birîndar kerd, keyeyê înan de çuwalêk çek vejîya werte. Sebebê nê nêame cigêrayene. Dozgerî cipersayîşî lazim nêkeno. Heta goreyê zanayîşan dosya zî yena nimtene."

 

'Tûta mi vera ke edalet bivîna dinyaya xo bedilnaye'

 

Nurcane tewr peyîn wina vat: "Ez bi mengan nêweşxane de vinderta. Mi hewl da ez çîyê ke ameyê sereyê mi bidî eşnawitene. La her kes ker, lal û kor mend. Mi bi desan rey vengdayîşê rêxistinê cinîyan kerd. Ez bi mengan tena menda. Kesî destê mi nêgirewt. Tu sazî û komele ma dir eleqedar nêbî. Kênaya mi 138 rojan têkoşîn da û vera ke edalet bivîna dinyaya xo bedilnaye. Semedê tûtî bînî nêrê qetilkerdene, ganî ma wayîrê têkoşînê edaletî bivejîyê."