Sema Çaglak

 

DÊRSIM - Roniştixê Dêrsimijî hemverê qetilkerdişê Denîz Poyraze de reaksîyonê ramojnayî û vatî: "Cinî do bi têkoşîn û xoverdayîşê xo hemverê hedef mojnayîşî îqtîdarî vejîyê. Êdî ma nêwazenê kiştişê cinîyan bieşnawê."

 

17ê hezîrane de hemverê bînaya Partîya Demokratîke ya Şaran (HDP) Îzmîrî saetê sibayî de hêriş ame kerdene û endama HDPyî Denîz Poyraz ameye qetilkerdene. Seranserê hewteyî herême û Tirkîya de cinî bi sloganê, "Denîz Poyraz bêmerg a" vejîyayî meydanan û çalakîyê protestoyî kerdî. Roniştoxê Dêrsimî zî qetilkerdişê Denîze şermezar kerdî û fikrê xo ajansê ma dir pare kerdî.

 

'No hêriş hemverê heme cinîyan ameyo kerdene'

 

Nurcan Bîngol, dîyar kerd do nefret heta key dewam bikero û vat: "Êdî bes o, wa gonî nêrijîyo. Wa êdî hesrê dayîkan nêvarê. Ma pêro Denîz Poyraz ê. No hêriş hemverê heme cinîyan rê ameyo kerdene. Qetîlkerdişê Denîz Poyraz bi plankerde ame kerdene. No kiştox senîn eşkeno bi rehetî bikewo zere. Bi tena sereyê xo nêeşkeno no qetlîam bikero. Qetî pey ey de hêzê bînî estê. Senîn eşkenê adir verdê bîna û cinîyêke qetil bikerê. Nê cesaretî çara gênê. Ganî kiştoxî hesab bidê. Ganî cinî vera nînan bibê hêzêk yewperçe û têkoşînê xo pîl bikerê."

 

'Pey serebûtî de hêzê lêşinî estê'

 

Gulhan Karaman qetilkerdişê Denîz Poyraz şermezar kerd û vat: "Ma hema zî nêeşkenê bawer bikerê ke nê qetlîamî senîn kerdê. No îqtîdar bi gonî xo payra verdeno. Îqtîdar nêwazeno cinî aver şêra. Coka cinî xo rê sey asteng vîneno û semedê caardişê polîtîkayê xo de tewr zêde cinîyan hedef gêno. Labelê ma do destûr nêdê wina dewam bikero. Cinî do têkoşîn û xoverdayîşê xo pîl bikerê. Ma êdî nêwazenê dayîkî bibermê. Sucdar xora dîyar o la wa serê serebûtî nêro padayene û wa êdî edalet bi ca bêro."

 

'Wa pêro cinî bêrê têhet têkoşîn bikerê'

 

Vehbîye tayan zî reaksîyon vera qetilkerdişê cinîyan da û vat: "Êdî bes o wa cinî nêrê qetilkerdene. Ez sey cinîyêke zaf xemgîn bîya. Tu cinî kiştiş heq nêkena. Semedê cinî bêpawitiş vînenê, nêverdenê cinî aver şêrê û fikr û fehmê xo vajê. Komel qetilkerdişê Denîz Poyraz bi vengêk xurt şermezar kerd. Wayîrvejîyayîşêk pîl vejîya. Wa cinî kom bibê û vera qetilkerdişê cinîyan de têkoşînê xo girs bikerê. Ma êdî nêwazenê kiştişê cinîyan bieşnawê."