Medya Uren

 

MÊRDÎN - Ehmed Çelîk vernîya 6 serrî amebi tepiştene û îşkence bi ci amebi kerdene. No zî bi sebeb ke bibo astengdar. Nika nêeşkeno rayîra şêro, yanî lazimîyê xo bica bîyaro. Cinîya ey Xezal Çelîk zî dîyar kerd ke dimayê tepiştişê Ehmedî problemê pîl yê ekonomî û psîkolojîk rî dano. Xezale vat, lazim o ganî tecrîd serê tepişteyê sîyasîyan peynî bibo.

 

Tirkîya de polîtîkayê hêrişî taybetî yê serê kurdan her ke şino xidar benê. Bi tecrît, polîtîkayê feqîrkerdişî, tepiştiş, tehdîd û destbendkerdişan dir wazenê îradeyê kurdan bêro şiknayîş. Tepişteyê sîyasî tecrît de yê û keyeyê înan zî înan dir yenê tecrîdkerdene. Keyeyê Xezal Çelîk zî nimûneyêk netîceyê nê tecrîdî yo. Nînan ra yew Ehmed Çelîk, dimayê ke ameyo tepiştiş îşkence ci amebi kerdene. No zî bi sebeb ke bibo astengdar. Xezale û tûtê xo zî yenê tecrîdkerdene.

 

'Îşkence bi Ehmed kerdî'

 

Xezale destpêkê qiseykerdişê xo de qalê Ehmed Çelîk kena û vat: "Ma bi karê erdî dir eleqedar bîne. Seke yeno zanayene zî her çiqa ma karêk zêde nêkerdêne zî ma pê debara xo û tûtanê xo kerdêne. Vernîya 6 serrî polîsan eşt serê keyeyî û verê çimanê ma de îşkence kerdî û berdî. Wextê tepişti zî 2 rojê vernî îşkence bi kerdî. Xeylêk zirar dayî Ehmed. Derbê pîlî mezgê ci girewt. Problemê ke vejîyayî vernîya Ehmedî, hetêk ra psîkolojîkê tûtan xirab kerdibî. Pîyê înan hişê înan ra nêvejîyayîne, roja ke berdê, senîn kuwayî hişê tûtan de mend. Tûtê ma bi nê serebûtan vînenê bi hêrs pîl benê."

 

'Wareyê ekkonomî de ma zehmetî vînenê'

 

Xezale bale ant serê problemê ekonomî û vat: "4 tûtê ma estê û tewr pîl 17 serre yo/ya. Dimayê tepiştişê Ehmedî ma zehmetîyê pîl dî.  Tûtê min o qij 1 serre bi. Tena birayê mêrdeyê mi, ma rê bîne hetkar la rewşa ey ya ekonomî zî zêde baş nêbî. Dimayê Ehmedî serrêke nêkewt mabêne o zî ame tepiştene. Hetê ekonomî de ma zehmetî ancenê. Xora o wext Ehmedî rê 16 serrî ceza ameye birnayene. No zî semedê ma demêkê zaf derg o. La ma hewl da ke tûtanê xo pîl bikerê. Tûtê min o qij wextê pîyê ey ame tepiştene, 1 serre bi û nika bîyo 7 serre. Tewr zêde zî o zehmetî vîneno. Her roje persê pîyê xo keno û ez reyan bena rincan ke cewab bida."

 

'Ganî ma vera tecrîdî sere wedarnê'

 

Xezale tewr peyîn wina vat: "Semedê tecrîd ê serê heme tepişteyê sîyasî yê ke rehîn ameyê tepiştene, lazim o ma sere wedarnê. Êdî bes o! Ganî bi taybetî tepişteyî nêweşî serbest bêrê veradayene. Bi seyan tepişteyê nêweş yê emrê înan pîl o zîndanan de yê û îşkence înan rê yeno kerdene. Sey Ehmedî heta ke nêame tepiştene tu problemê ey çinbî, la nika astengdar o. Ganî şar wurzo. Lazim o ma tecrîd bişiknê."