AMED - Semedê Vervatoxa  Têgêrayîşê Cinîyan ê Azadan (TJA) ya dewrî Ayşe Gokkan cezaya 35 serran ameye waştene.

 

Roniştişê 21in yê dewaya ke derheqê Ayşe de bi îdîaya îdarekar û endama rêxistine û propagandaya rêxistine ameybî akerdene Meykemeya Cezaya Girane ya 9ine ya Amedî de ame kerdene. 

 

Ayşe Gokkana ke ganî bi sîstemê SEGBÎSî tewrê roniştişî bibîyêne bi îdîaya sîstemî de problem esto nêeşkaye tewrê ci bibo. Avûkatê Ayşe Gokkan; Berfîne Gokkan, Ozum Vurgun û Gozde Engîn tewrê mehkeme bîyî.

 

Destûr nêdîya parlamenterê HDPyî Semra Guzel û Remzîye Tosun, aktîvîstê TJA, endamê Komeleya Cinîyan a Rosa, femînîstê xoserî û merdimê Ayşe Gokkan debikewê salonê mehkeme.

 

Tehlîye red kerdî

 

Dozgerî waşt 16 serran ra heta 35 serran wa ceza bêro dayene. Heyetê mehkeme vat kontrolê edlîyî kêm nêkeno û qerarê dewamê halê tepiştişê Ayşe Gokkan da. Roniştiş 12ê êlule rê pey de ame eştene.