ENQERE - Endamê Înîsitiyatîfê Dayîkê Aştîye reaksîyon vera hêrişê Herêma Federal a Kurdistanî dayî û vatî: "Şerê ke ameyo destpêkerdene, yeno manaya înkarkerdişê kurdan. Hemverê înkarî zî ganî kurdî yewbîyayîşê xo viraznê."

 

Reaksîyon û nêrazîbîyayîşê hêrişê hemverê Herêma Federal a Kurdistanî dewam keno. Operasyonê bersînor ê Arteşa Tirkî yê vera herême dewam keno. Operasyono ke bi hemkarîya Partîya Demokratîke ya Kurdistanî (PDK) bi ca yeno, bi sebebê nêrazîbîyayîşî. Endamê Însyatîfê Dayîkê Aştîye yê Enqereyî reaksîyon vera rewşe dayî û vengdayîşê yewîye kerdî.

 

'Ganî Kurdî pey aştî şêrê'

 

Hatîce Ay bale ant serê girîngîyê yewîya kurdan û wina vat: "PDK wa bi tu hawayî kesî xo rê destek nêvîno û xo xurt hîs nêkero. Barzanî do rojêke nê dewleta Tirkî ra bieşnawo, 'Hema feydeyê to to rê çin o, ti do senî feyde bidê mi.' Semedê nê zî Başûr, Vakur, Rojhelat û Rojawan ferq nêkeno. Ganî her çar het ra yewî û têduştî bêra awankerdene. Wa kurdî pey aştî, ziwanê xo û bîyayîşê xo şêrê."

 

'No şer şerê înkarkerdişê kurdan o'

 

Hatîce wina dewam kerd: "No şer, şerê înkarkerdişê bîyayîşê kurdan o. Ma estê, kes çin o ma înkar bikero. Kurdî do tu wext fek ziwan, têkoşînê xo ra vera nêdê. Wa taybetî Mesut Barzanî baş goşdarî bikero, no çîyo ke keno, şaş o. Wa îmkan nêdo ke Tirkî bikewê herêma Başûrî. Barzanî şaş o, sey Saddamî yo. Wina dewam bikero do peynîya ci zî bêro. Barzanî ewro paşta xo daya înan. La merdim no bi wayê û birayê xo nêkeno. Wa kes nêvajo do kurdî biqedê. Wa Barzanî rayîr nêdo înan, wa çimanê xo nêdo pa. Her roje merdimî yenê qetilkerdene. Şerê birayî zehmet o. Do tewr peyîn o zî zirar bivîno."

 

'PDK û Erdoganî pê kerdo'

 

Kadrîye Ozgan zî veng da PDK û vat: "Barzanî birayê ma yo. Wa nêkewo nê şerî lêşinî. Ganî PDK pey nêdo wayê û birayanê xo. Ê kurd ê, ma zî kurd ê. No zaf zelal yeno vînayene; PDK û Tayyîp Erdoganî serê babete de pê kerdê û soz danê yewbînan. La ez Barzanî ra vana, meyê kayê Tayyîpî, ti do poşman bibê. Goreyê Tayyîpî tûtê ma terorîst ê. Tûtê m aterorîst nêyê. Ê ganê ma yê. Tûtê m ahêrişê kesî nêkenê, la ê şinê hêrişê tûtanê ma kenê. Tûtê ma herre, ziwan û kulturê xo pawenê."

 

'Merdim rayîrê dişminî anêkeno'

 

Kadrîye tewr peyîn wina vat: "Ma dayîkê aştîye nê zulmî ra vanê bes o. Gelo do sebrê ma heta key şêro. Eke semedê vindarnayîşê şerî lazim bikero ez o şewe û rojî sînor de ronişî. Barzanî hîn kanalan ra vano ke her çî PKK keno. Tayyîp axa to to îşxal kerdo, her roje merdiman kişeno, qetil keno, wexto zerrîya înan biwazo to vêşan verdeno. La ti Tayyîpî goşdarî kenê û sînor înan rê akenê. No merdimayî û edalet nêyo. Merdim rayîr dişminê birayê xo rê anêkeno."