Melîke Aydin

 

ÎZMÎR - Parlamentera HDPyî Serpîl Kemalbay, dîyar kerd ke kiştoxêk profesyonel şawitî bînaya partîye û vat: "No proses qetî û qetî teberê îqtîdarî de aver nêşîyo. Teberê zanayîşê MÎT, îstîxbaratî yan zî emnîyetî ra bica nêameyo. Şikdar nê cînayetê sîyasî, îqtîdar o. Bi amancê şar HDPyî ra bêro dûrfistene ame kerdene la nêresayî amancê xo."

 

Reaksîyon û nêrazîbîyayîşê hemverê qetilkerdişê endama Partîya Demokratîke ya Şaran (HDP) ya Îzmîrî Denîz Poyraz dewam keno. Rêxistinê HDPyî yê şaristan û qezayan şîn dayî ro û sersaxî qebul kenê. Xeylêk sazgeh, dezheg û partîyê sîyasî bi eşkerayî û çalakîyê xo qetilkerdişê Denîze şermezar kerdî. Derheqê qetilkerdişê Denîze de parlamentera HDPyî ya Îzmîrî Serpîl Kemalbay ajansê ma rê qisey kerd û dîyar kerd ke Tirkîya bi qirkerdiş û suîkastan dir nîna rî bi rî û eynî çî ancî yeno ciwîyene.

 

'Semedê ters awan bikerê hêriş kerdî' 

 

Serpîle qiseykerdişê xo de bale ant serê îqtîdar her roje rayan vinî keno û coka muracatê her çî keno, xo rê meşrû vîneno û vat: "Semedê sîyasetê xo dîzayn bikero, kaos û ters awan bikero, hemverê HDPyê Îzmîrî de hêriş kerd. Denîze bi çimsûrîyêk pîl ameye qetilkerdene. Fotografê parlamentera ma ya verê Sebahat Tuncel gulevaran kerdo. Yanî şikdar hende çimsûr bîyo. Kiştoxêkê zaf profesyonel şawitê bînaya ma. Goreyê ma no proses qetî û qetî teberê îqtîdarî de aver nêşîyo. Teberê zanayîşê MÎTî, îstîxbaratî yan zî eminîyetî bica nêameyo. Şikdarê cînayetê sîyasî, îqtîdar o."

 

'Îqtîdar nêresa hedefê xo'

 

Serpîle dîyar kerd guleyê ke Denîze rê ameyê varnayîş; azadî, demokrasî û şarê Tirkîya rê ameyê varnayîş û vat, Kadîfekale ra heta Kurdistanî her kes wayîrê Denîze vejîyayo û Serpîle wina dewam kerd: "Behrêsîya ra meridmî gêrayî û xemginîyê xo ardî ziwan. Vatî do nameyê tûtanê xo bikerê Denîz Poyraze. Coka ma eşkenê vajê, îqtîdar nêresa hedefê xo. Hedefê înan awankerdişê kaosî û şar HDPyî ra dûr bifînê. La şar wayîrê HDPyî vejîyeno."

 

Do reaksîyonî bêrê ramojnayene 

 

Serpîle dîyar kerd ke her şaristanî de quncikê Denîz Poyraze viraştê û Kadîfekaleyî de do çarşeme sersaxî peynî bo û dima ra bînaya merkezê Îzmîrî bêrê qebûlkerdene. Serpîle vat, partîya înan her roje semedê protestokerdişê qirkerdişî, semedê vengdayîşî têkoşînê yewbîyayî yê şaran do meşaleyî bikerê û reaksîyonê xo yê demokratîkî dayî werte.

 

Semedê caardişê xeyalan têkoşîn lazim o

 

Serpîle qiseykerdişê xo wina qedêna: “Denîze embazêka têkoşer û merdimêka aştî waştêne bî. Xeyalê cuyêka newe kerdêne. Nê hêrişê vera partîya ma bi amancê çinkerdişî yê. Ma zî semedê HDPyî bidê ciwîyayîş û xeyalê Denîze bi ca bîyarê têkoşînê xo dewam kenê."