STENBOL - Avûkatanê Rayberê PKKyî Abdullah Ocalanî semedê şêrê Îmrali û bi muwekîlê xo dir pêvînayîş bikerê, muracatê Serdozgerîya Komare ya Bûrsa kerdî.

 

Avûkatanê Abdullah Ocalanî ra Mazlum Dînç, Îbrahîm Bîlmez, Newroz Ûysal û Serbay Koklu bi amancê şêrê bi muvekîlê xo dir pêvînayîş bikerê, reyke bîn muracatê dozgerî kerdî.

 

Cewab nêno dayene

 

Serdozgerîya Komare ya Bûrsayî, bi bahaneyê Ocalanî serra 2009 de pawitişê bi nameyê "Xerîtaya Rayîrî" Dadgehê Heqê Merdiman ê  Ewropa (DMME) rê şawitib, 23ê Êlule 2020 de 6 mengî cezaya qedexeyî avûkatanê Abdullah Ocalanî rê birnabi. Pêwa cezaya qedexeyê avûkatan 23ê Adare de peynî bî zî reyna avûkatî nêeşkenê şêrê Îmraliyî û ne negatîf û ne pozîtîf cewab înan rê nîno dayene.

 

Avûkatanê Abdullah Ocalanî, Rêzan Sarica û Newroz Uysal, dimayê 8 serrî mabêne 2-22ê Gulane, 12-18ê Hezirane û 7ê Gulana 2019 de şîbî Îmrali.

 

Pêvînayîş amebi birnayene

 

Abdullah Ocalan 22 serrî yo Zîndanê Tîpê F yê Îmraliyî de tena 2 rey bi telefon keyeyî dir qisey kerd. Abdullah Ocalan ke 22 serrî yo tecrîd de yo, reya ewil 27ê Nîsana 2020 de tena 20 deqîqeyan bi telefon dir qisey kerd. Tewr peyîn serê îdeayê medyaya komelî de vila bî, dimayê reaksîyonê komelî 25ê Adara 2021 de Edliyeyê Rihayî de tena 4.5 deqîqeyan bi rayîrê telefonî birayê xo Mehmet Ocalanî dir qisey kerd. Na reyê peyîn zî telefon birnayî û reyke bîn destûr nêdayî ke Ocalan bi telefon dir qisey bikero. Pêro muracatê keye û avûkatan bêcewab yenê verdayene.