ÎZMÎR - Nesrîn Kahraman ke hetêk ra problemê debare ciwîyena û heto bîn ra zî semedê lajê xo yê ke tiryakî xebitneno, hunermendîya kuçeyan kena, dîyar kerd ke tu sazgehêkê muracat kerdo ci rê hetkarî nêkerdo û vat, semedê asayîşê ganê xo bi endîşeyîn a.

 

Nesrîn Kahraman Îzmîr de bi di serrî yo hunermendîya kuçeyî kena û çimeyê aye rastî protez o. Nesrîne eynî wextî de semedê lajê xo yê 24 serrî ke tiryakî xebitneno zî, hewldayîşê vînayîşê çareyêk de ya. Nesrîne dîyar kerd ke aye bi endîşeyîn a ke lajê ci semedê pere zirar bido ci û heme sazgehê ke muracat kerda zî ci rê nêbîyê hetkar. Nesrîne dîyar kerd hetkarîya ke dima ra yena kerdene, manaya ci çin a.

 

'Yê ke kewenê behrî xo marî rê pêşenê'

 

Nesrîne serebûtê peyîn ke ciwîyaya wina qal kerd: "Dayîke zî ez a, pî zî ez a. Ez çareyêk nêvînena. Şewa vîyarte şan de ra heta serê sibayî ez qerekole de bîya. Ez wazena ke lajê xo derman bikera la kes hetkarî nêkeno. Çareyo peyîn mi vat, ez bierzî zîndan ke tiryakî nêvîno. Yê ke kewenê behr xo mar rê pêşenê. Mi zî vat, madem nêweşxane çin o wa zîndan de bo."

 

'Ez bi zor debara xo kena'

 

Nesrîne tewr peyîn vat, malulen teqawît bîya l ameaşê ci qîm nêkeno û coka hunermendîya kuçeyî kena û vat: "Ez, lajê min o, Homayî mi esto. Ma tena yê. Ez bi kesî dir problem nêciwîyena. Her kes hunerê mi ecibneno. Vanê, 'çira tu kuçe de muzîk kena.' La kes bi destê mi nêgîno. Qedexeyan de problemê ma zêde bî. Coka ma pey nanê xo yê. Ez Konak û Karşiyaka de deyîran vana. Rojaneyê ma dîyar nêyo. Qezencê ma kêm o, semedê nê ma nêeşkenê xo rê pere zî bidê pê ser. Ma qezencê rojane bi dest kenê û o zî qîmê a roje nêkeno."