STENBOL - Embazê têkoşînî yê endama Koordinasyonê Cinîyê Ciwanan ê HDPyî Esengul Kiliç ke ameye tepiştene, dîyar kerdî ê do polîtikayê dewlete yê hemverê cinîyê ciwanan her ca de teşhîr bikerê û vatî: "Bi tepiştişê Esengule ma vînenê ke dewlete çend têkoşînê cinîyan ra aciz a."

 

Cinî hem têkoşînê pîl kenê, eynî wextî de rêzxistinbîyayîşê xo hîra kenê. Pêwa nê polîtikayê tedayê dewlete yê hemverê cinîyan zî zêde benê. Îqtidaro ke bi hawayêke sîstematîk hêrişê tevgerê cinîyan ê kurdan keno xeylêk sazgehan pada û temsîlkarê sazgehan zî tepişt. Bi polîtikayê şerê taybet yê şaristanê Kurdan de yenê bi caardene, cinîyê kurdî wareyê komelî de yenê tecrîdkerdene. Bi nê çî wazenê ke bingehê cinîyan "maqûl" awan bikerê. Cinîyê ke wazenê xo her ware de birêxistin bikerê, bi astengîyê dewlete dir rî bi rî manenê û hetê asayîşê yê dewlete ra bi tedayê ajankerdişî, tehdîdî dir rî bi rî manenê. Sewbîna rastê tacîz zû tecawuzî yenê. Heto bîn ra her roje cinî yenê tepiştene û yeno waştene ke vernîya rêxistinbîyayîşê cinîyan padê.

 

Hewteyê vîyarte demê seyahatî de kontrolê GBTyî yê endama Koordinasyonê Cinîyê Ciwanan ê HDPyî Esengul Kiliç ame kerdene û bi bahaneyê qerarê tepiştişî esto, Esengule ameye destbendkerdene. Dima ra hetê dadgeha ra ameye tepiştene û aye berdî Zîndanê Tîpê L yê Ferizli yê Sakaryayî. Endamê Cinîyê Ciwanan ê HDPyî  Roj Medrin Bor û Rojin Keskin dîyar kerdî ke kurdî tena serê nasnameyê cinîtî de têkoşîn nêkenê, coka benê hedef.

 

'Rêxistinbîyayîşê cinîyan semedê îqtîdarî îqaz o'

 

Endamê Cinîyê Ciwanan yê HDPyî Roj Medrin Bor dîyar kerd ke polîtikayê tedayê îqtîdarî hemverê cinîyê rêxistinkerde de her ke şino zêde beno û vat: "Rêxistinbîyayîşê cinî semedê dişminî îqazêk eşkera yo. Ewro îqtîdar serê cinîyan de  polîtîkayê xo dewam keno. Ma zî têkoşînê xo dewam kenê. Polîtikayê ferzkerdişê ajantî çiqas vejêno, hende ma semedê teşhîr bikerê, xo ver danê. Rojê vîyarte de vera embazêke ma ya TJAyî de polîtikayê tehdît û teda ameyî kerdene. Ma bi îqtîdarêk Musa Orhan paweno dir rî bi rî yê. Ma azadîya cinîyan esas gênê û ma vanê heta cinî azad nêbê, komel zî azad nêbeno. Kurdistan de cinîyê ciwanî serê nasnameyê kurdî û nasnameyê cinî û eynî wextî de serê nasnameyê ciwantî de têkoşîn kenê. Nê serdemî de bi taybetî cinîyê ke têkoşîn kenê yenê destbednkerdene. Esengule zî nê cinîyan ra yew a."

 

'Ma do polîtîkayê lêşin ê dewlete teşhîr bikerê'

 

Endamê Cinîyê Ciwanan ra Rojîn Keskîn dîyar kerd, temamê Rojhelatê Mîyanên de helwestêk îqtîdarî taybetî vera cinîyan esto û vat: "Embaza ma Esengule demê têkoşînê nasnameyî dayîne, ameye destbendkerdene. Ma nê polîtîkayê alçax ê dewlete şermezar kenê. Bi tepiştişê Esengule ma vînenê ke dewlete çend hemverê têkoşînê cinîyan aciz a. Ê tehdîdan zî bikerê, ma do têkoşînê xo ra fek vera nêdê. Ma do polîtikayê lêşin ê dewlete teşhîr bikerê."