Medya Uren

 

MÊRDÎN - Cinîyê Mêrdînijî derheqê kampanyaya semedê ziwanê kurdkî bibo ziwanê fermî û perwerdeyî dîyabi destpêkerdene de wina vatî: "Ziwan bîyayîşê ma yo. Semedê ziwanê ma biciwîyo, ganî bibo ziwanê perwerdeyî. Semedê ziwanê ma çin nêbo, ma pîya sere wedarnê."

 

Goreyê cigêrayîşê zanistî serê rîyê dinya de nêzdîyê şeş hezarî ziwanî estê û ziwanan ra se ra 2 sey ziwanê fermî yenê qebulkerdene. Semedê sebebê nîjadperestî bi hezaran ziwanî mehkûmê vinîbîyayîşî benê. Semedê ziwanê kurdkî zî nêbo sey ziwanê vînîbîyaye, kampanyaya îmzeyan ê ziwanê kurdkî herêma vakur de hetê Torra Ziwan û Kulturê Kurdkî û Platformê Ziwanê Kurdkî de 21ê Sibate de ame destpêkerdene. Semedê paştdayîşê kampanya, cinîyê Mêrdînijî veng dayî keyeyan ke wayîrê kampanya û ziwanê xo vejîyê.

 

'Kes nêeşkeno ziwan înkar bikero'

 

Seyhan Yuksel bale ant serê girîngîyê ziwanî û vat: "Kes nêeşkeno ziwanê ma, nîjadê ma û kulturê ma înkar bikero. Ma kurd ameyê viraştene û ma do kurdkî biciwîyê. Eke ma kurdkî nêciwîyê ma do xîyanet xo rê, ameyox û vîyartoxê xo rê bikerê. Lazim o ma xîyanet layiqê xo nêvînê. Ziwan bîyayîş û cuya ma yo. Semedê nê sebebî waştişê mi heme dayîkan rê esto ke ziwanê xo rê wayîr vejîyê. Çarenûsê ziwanê ma destê ma de yo."

 

'Asîmîlasyonê ziwanî zulm o'

 

Helime Demîr zî dîyar kerd semedê ziwanê kurdkî fermî nîyo coka zehmetî ancenê û vat: "Ma şinê nêweşxaneyêk ma nêeşkenê xo îfade bikerê. Weşî, nêweşî û heme serebûtî de ma zehmetî ciwîyenê. Semedê ke ziwanê ma ziwanêk fermî nêyo. Yê ke kurd bê şinê mektebî zî ziwanê xo xo vîr ra kenê. Eke rewşe wina ba, do ziwan ganebîyayîşê xo vinî bikero. No zî yeno manaya merdişê ziwanî û komelî. Semedo ke ziwanê ma nêmiro, ganî ma pîya paştdayîş bidê kampanya. Lazim o ma pîya sere wedarnê û têkoşîn bikerê. Asîmîlasyonê ziwanî zulm o û ma nê zulmî ra vajê êdî bes o."

 

'Wayîrê ziwanê xo vejîyê'

 

Xeyrîya Karataş zî bale ant serê girîngiyê ziwanî û vat: "Ziwan mîrasê komelî yê tewr bi erjî yo. Lazim o ma nê erjî bipawê. Ewro ziwanê ma, nîjadê ma, bîyayîşê ma yeno înkarkerdene. Nika dem demê serewedaritişî û wayîrvejîyayîşê ziwanî yo. Hema erey nêbîyo, ma sere wedarnê. Semedê ziwan û kultur bi seyan ganî ameyî dayene û bedelî ameyî dayene. Ganî ma no het ra biewnê. Dayîknê, tûtinê, ciwanê ma pêro pîya wayîrê ziwanê xo vejîyê."

 

'Ganî ma semedê ziwanî pîya têkoşîn bikerê'

 

Hatîce Ar zî vat, her ziwanêk merdimêk o û vat: "Ma hemverê ziwanê xerîbîyan nêyê. Her ziwanêk merdimêk o. Ma dişminîyê tu ziwanî bînî nêkenê. Labelê wextê ti ziwanê xo nêzanê û ti ziwanêk bîn bizanê ti do reyna nêeşkê bîyayîşê xo bipawê. Nika ma ewnîyenê Kirmanckî ra çi heyf ver bi çinbîyayîşî şino. No kêmî û şermê ma yo. Coka nika zî dem demê wayîrvejîyayîşê ziwan û kulturî yo. Ganî ma semedê ziwanî pîya têkoşîn bikerê."