ÎZMÎR - Maya Denîze Poyraza ke hêrişê vera bînaya HDPyî ya Îzmîrî de ameye qetilerdene, vat: “Şarê kurdî tim payan ser o, do tim pay ra bo. Denîzêke şîye, Hezar Denîze do bêrê.”

 

Saetanê serê sibayî de hêrişkerî, hêrişê bînaya Partîya Demokratîke ya Şaran (HDP) ya Îzmîrî kerd. Hêrişkerî xebatkare Denîze Poyraz qetilkerd û bîna da adir ver. Maya Denîze Poyraz, Fehîme Poyraz şîye bînaya partîye ke kênaya xo bîvîne la polîsan destûr nêda.

 

Hemverê astengkerdişê polîsan de Maya Denîze, Fehîme Poyraz vat: “Bîlasebeb kênaya mi qetil kerde. Hem kênaya mi qetil kerda, hem zî nêverdenê ez aye bîvînê. Berê akerê ez şina zere. Çew nêeşkeno mi vindarno. Domana mi mirênayê. Çi heqê şima estbi, şima domana mi qetil kerde. Hûma zî do şima bimirnê înşalah. Ez dayîk a, heqê mi yê qiseykerdişî esto. Wa çew mi rê mevajo vengê xo meveje.”