Rojda Aydin

 

Dewleta tirkî 23yê nîsane de hêrişê Herêma Federal a Kurdistanî kena, tewr peyîn zî 5ê hezîrane de bi teyareyê bê merdim (SÎHA) hêrişê Wargehê Multecîyan a Şehîd Rûstem Cûdî (Mexmûrê) kerd. Hemverî operasyonê ke vera başûrê Kurdistanî yeno kerdene, her hat ra reaksîyon yeno ramojnayene. Mayê Şirnexî zî derheqê babete de reaksîyonê xo ardî ziwan.

 

‘Barzanî destê xo bido serê wijdanê xo’

 

Maya Nebiha Akay reaksîyon ramojna û vat: “ PDK wa nêro kayê Tirkîya. Koyê Kurdistanî ke bi gonîya tûtanê ma ameyê awdayîş wa nêroşo. Koyê Kurdistanî halînê tûtanê kurdî û mayanê kurdan o. Wa Mesût Barzanî destê xo bido serê wîcdanê xo. Senîn wayê û birayî şerê yewbînan bikerê. Vengdayîşê ma Mesût Barzanî rê oyo ke şerê hemkiştişî nêdê  destpêkerdene. Wa gonîya kurdan bi destê yewbînan nêdê rijnayene. Dewleta tirkî dişmin a, hêriş kena û karê xo kena, la ganî Barzanî nêro kayê Tirkîya. Ma hêvî û waştiş kenê ke nê şerî bidê vindarnayene û tûtê ma dinyaya xo nêbedilnê. Ma mayî azadî, aştî û têduştî wazenê. Ma wazenê serê maseyê bi sîyasetî çareserî bikerê. Bi kiştiş tu çî çareser nêbeno. Barzanî do poşman bibo şerê ke bêro destpêkerdene. Heqê tu kesî çin o kurdan bi kurdan bido kiştiş. Başûrê Kurdistanî de tu kerra nêmemda ke gonîya tûtanê ma ser de nêrijîyaya. Êdî bes o wa zerrîya mayan nêveşo.”

 

‘Ganî ma bibê yew’

 

Maya Fatma Acar zî wina vat: “Wextê ma tût bî, ma ameyîne Silopi. Ma vatêne texsiya mela Barzanî spî ya, pirî lajê kurdî ya û no omid dayîne ma. Nika zî ma omid Mesut Barzanî kenê ke vernîya nê şerî bigîro. Feydeyê nê şerî tu kesî rê çin o. Wa  Barzanî nêro kayê dewleta tirkî. Ma pêro kurd ê. Wa PDK hemkarî bi Tirkîya dir nêkero. Ganî çar parçeyê Kurdistanî de ma destê xo bidê yewbînan û ma bibê yew. Ê wazenê peynîya kurdan bîyarê. Yan ma do sey Pêkerdişê Lozanî do vinî bikerê, yan zî ma azad bibê. Barzanî ganî maseya çareserî rono. Vengdayîşê ma kurdan dir esto ke xîyanet bi birayê xo nêkero. Ma omid kenê aştî bêro welatê ma.”

 

‘Ma xoverdayîşê gerîla silam kenê’

 

Kiymet Acar zî vat, Tirkîya hêrişê wareyê gerîla kena û vat: “Ma xoverdayîşê gerîla silam kenê. Ê gerîlayê uca heme roşnîyê çimê ma yê. Pawitoxê çar parçeyê Kurdistanî yo. Ma Rojawan û Şengal bi çimanê xo dî. Mesût Barzanî qet zerrîya to nêdejêna. Wa pêşmerge mil bidê milê gêrîla û dişmin serê herra ma ra vejê. Wextê ma şahadetê tûtanê xo eşnawenê zerrîya ma dejena. Wa êdî hesirê mayan nêvarê. Eke Barzanî rayîr nêdayîne Tirkîya, tirkîya nêeşkayîne şêra Başûr. Çira rayîr da Tirkîya. Heme darê ma birnayî û xozaya ma veşnayî. Senîn cinîyê şengalî bazaran de ameyî rotene, eke gerîla nêbo do eynî çi ma rê zî bikerê. Ma ewro bi xeyrê gerîlîyan ciwîyenê. Eke Tirkîya Başûr de bi ser kewa do dore bêro Barzanî zî. Wa Barzanî vernîya dişminî anêkero.”