Sema Çaglak

 

AMED - DÎSKÎ, awa 3 dewê Yenîşehîrê Amedî birna û eynî wextî 8 hezar TL ceza dewijan rê birna. Cinîyan reaksîyon vera na rewşe dayî û vatî: "Ma cezaya ke ameya dayene qebûl nêkenê, xora ma bi zor û zehmet debara xo kenê. Ma nê zulmî qebûl nêkenê."

 

Mudurîyê Pêroyî yê Îdareyê Qenalîzasyon û Awe ya Amedî (DÎSKÎ), 3 dewê ke girêdayê qezaya Yenîşehîrê Amedî de yê welatijan rê 8 hezar TL. cezaya pere dayê. Dewijê Kamişek, Eynetiyê Cor û Bahçelîevlerî de hem semedê birnayîşê awe, hem zî birnayîşê cezaya pere ameyî mexdûrkerdene. Cinîyê ke ameyê mexdûrkerdene, reaksîyon vera rewşe dayî û vengdayîşê paştdayîşî kerdî.

 

'Ma na ceza qebul nêkenê'

 

Remzîye Kurt, dîyar kerd ke 10ê hezîrane ra na ceza welatijan rê ameya dayene û vat: "Hêzê ma çin o ke ma hende pere bidê. Xora rewşa ekonomîya dewijan eşkera ya. A roje ra dewijî  fikiryenê ke do senîn pere bidê. No çî yeno manaya zulm î. Ma na ceza qebûl nêkenê. Vanê ke semedê îqazkerdişî çîyêk winasî kerdê, la qey îqazkerdiş no yo! Xora hamnanî ma biawe verdenê. Ma her aşme faturayanê xo zî danê. La bîlasebeb ma rê ceza dayê.  Coka heme kesî reaksîyonê xo nîşan danê û tu heqê kesî çin o ke ma bikerê rewşêka wina. Eke wina dewam bikero, mîyanê dewijan de  gengeşîyêk vejîyo. No nêzdîbîyayîşê DÎSKÎ nêno qebul kerdene."

 

'Ma bi zor debara xo kenê'

 

Hatun Arslan zî dîyar kerd ke demê dewlete kewena tengasîyê pereyan verê xo dana welatijan û vat: "Ma serê sibayî heta şan de çol û zîyanan de yê. Semedê krîzî ma bi zor debara xo kenê. Xora ma problemê awe ciwîyenê. Tena mi rê ney, temamê dewijan rê 8 hezar TL. ceza dayî. Ma do senîn hende pere bidê nêzana. Rojêke ameyî tu çîyêk mi ra nêvatî û tena waştî ma vanayê xo bigîrê. Dima ra ma rê belgeyî ameyî ke hende ceza ameya birnayene. Nika pêro dewijî rewşêka perîşan de yê."

 

'Hem awe birnenê hem ceza danê'

 

Fatma Surucu zî wina vat: "Bi rojan o dilopêk awe ma çin a. Tena şan de saetêke yan zî di saet yena û reyna şina. Hem awa ma birnenê, hem cezaya pereyî ma rê birnenê. Keyeyêk hende pere ça de bivîno. Ma nêeşkenê heqê faturayanê xo bidê, dewlete nê zulmî ma rê kena. Baxçeyê ma û heywanê ma estê. Qet nêfikrîyenê ke ma do înan senîn wey bikerê."