Dîlan Babat - Oznur Deger

 

ENQERE - Hemserek û îdarekarê HDPyî yê Bursayî semedê paştdayîş bidê sîyasetmedarê ke dewaya Kobanî de yenê muhakemekerdene tewrê roniştişî bî û vatî: "Ma vengdayîşê wayîrvejîyayîşê HDPyî kenê. Çi beno wa bibo ma do xoverdayîşê xo dewam bikerê."

 

Bi bahaneyê nawnayîşê semedê Kobanî yê 6-8ê Teşrîna verêne ya 2014ine de amebi kerdene, derheqê Hemserekê Pêroyî yê Partîya Demokratîke ya Şaran (HDP) yê verê  Fîgen Yuksekdag û Selahattîn Demîrtaş zî mîyan de 108 sîyatmedaran rê dewa amebî akerdene. Roniştişê 3în ê Dewaya Kobanî ke 24 ci ra tepişte, 108 sîyasetmedarê kurdî ke  yenê muhakemekerdene, roja hîrên de 22yîn Dadgeha Cezaya Giran ya Enqereyî ya Kampûsê Zîndanê Sîncanî de yeno kerdene. Xeylêk parlamenterî û îdarekarê HDPyî dewa nêzdî ra taqîb kenê.

 

'Ma do wayîrê partîya xo vejîyê'

 

Îdarekara Rêxistina HDPyî ya Bursayî Hedîye Apakan Dewaya Kobanê taqîb kena. Hedîye dîyar kerd ke hemverê kurdan de zulmêk esto û vat: "Ma tîya wayîrê dewaya xo vejênê. Tena semedê partîya ma sîyaset ameyo qedexekerdene. Ma semedê paştdayîş bidê partîya xo ma ameyî tîya. Ma nêwazenê partîya ma bêra padayene. Ma zulmo bîyaye qebul nêkenê. Kesê ke sey înan zulm bikero çin o, nê kesî embazê Saddamî yê. Saddam zî eynî çî hemverê kurdan de kerd. Çîyo ke Koban de ame kerdene, wehşet bi. Îqtîdar bi hemkarê nê wehşetî. La embazê ma zî semedê ke hemverê nê vejîyayî ameyî tepiştene. Nika reyke bîn zî wazenê eynî zulmî bi ma bidê ciwîyayîş. Vera nînan ganî ma wayîrê partîya xo vejîyê."

 

Do wayîrê dewaya xo vejîyê

 

Hemsereka HDPyî ya qezaya Yildirimî ya Bursayî Ceylan Yalçin, vengdayîş semedê wayîrvejîyayîşê sîyasetmedaran kerd û wina vat: "Fîgen Yuksekdag, Selahattîn Demîrtaş, Leyla Guven û sîyasetmedarê bînî, ganî ma wayîrê înan vejîyê. Ma semedê paştdayîşî ameyî tîya. Na dewa tena semedê kesê ke ameyê tepiştiş nêya, dewaya şarê Kurdî û Tirkî ya. Hemverê şarê Kurdî zulm esto, la ganî bêro zanayene zî ma zî fek xoverdayîşê xo ra vera nêdanê."

 

'Ma tîya sîyaset kenê'

 

Îdarekara HDPyî ya qezaya Gemlîkê Bûrsayî Hatîce Ateş zî dîyar kerd ke Kobanê de hemverê şarê Kurdî zulmêk estbi û vat: "Zulmo ke hemverê ma yeno kerdene, tu cayî de çin o. Serbest nênê veradayene la ma wazenê paştdayîş bidê embazanê xo. Heme sîyasetmedaran rê nêheqîyêk yeno kerdene.  Semedê destê înan de çîyêk çin o, Kobanê kenê bahane û wazenê partîya ma padê. Çîyê ke Kobanê de ameyî kerdene, gelo ma kerd? Ma tîya sîyaset kenê. Çi kenê wa bikerê, ma tîya yê û do têkoşînê ma dewam bikero. Ez vengdayîşê wayîrvejîyayîşê HDPyî kena."

 

Hatîce tewr peyîn bale ant serê tecrîdê hemverê Rayberê PKKyî Abdullah Ocalanî û dîyar kerd ke ganî waştişê tepişteyan bêro qebulkerdene.