Melîke Aydin

 

ÎZMÎR - Cinîya bi nameyê A.A ke bi arêdayîşê xurde û hacetê plastîkî debara xo kena, 4 tûtê ci hetê dewlete ra wargeh de ameyî bicakerdene. A.A ke bi di tûtanê xo dir têkoşînê cuye dana, dîyar kerd ke semedê tûtanê xo bigîra, mimkin nîyo ke şertê ci baş bê û vat, muracatê sazgehê dewlete daya la cewabêk pozîtîf nêgirewta.

 

A.A  vat, ‘Tay mendo ez bikewa mîyanê torra fuhuşî, berpirsîyar dewlete ya.’ A.A vengdayîşê paştdayîşî kerde.

 

Qezaya Bayrakli ya Îzmîrî de cinîya bi nameyê A.A ke bi arêdayîşê xurde û hacetê plastîkî debara xo kena, semedê têkoşînê cuye bi 6 tûtanê xo dir dana û pabeyê paştdayîşî ya. A.A û 6 tûtê xo vernê de çadire de ciwîyayî û dima ra ekîbê zabiteyî eştî serê çadire û bi tersê ke tûtê ci hetê Sazgehê Komelê Xizmetî ci ra bigîrê, qebûl kena ke konteynirê Merkezê Starbîyayîşê yê Walîtîya Bayrakli bi ca biba. Tîya de zî semedê nasnameyê xo yê Romanî rastê bêtêduştî yena.

 

Her çiqas semedê tûtanê xo qebul bikera ke konteynir de biciwîya zî, nêeşka ke vernî bigîra ke tûtê aye ci ra bêrê girewtene. 4 tûtê aye ke emrê înan 10, 8, 6 û 2 ci ra ameyî girewtene û hetê Sazgehê Starbîyayîşê Tûtan de ameyî bicakerdene. A. A nika bi di lajê xo têkoşînê cuye dana û yewin waştişê aye oyo keyeyêk aye bi tûtanê xo dir biciwîya, bibo. A. A  dîyar kerd ke ten ahewteyêk reyke tûtanê xo vînena û vat, bi arêdayîşê plastîk û kaxidî debara xo kena, bi tehlukeyê ke bikewa mîyanê torra fuhuşî dir ameya rî bi rî. A.A vengdayîşê paştdayîşî her kesî rê kerd.

 

'Vernê de hêvî dayî dima ra tûtanê mi girewtî' 

 

A.A vat, wextê konteynir de ameya bicakerdene, sozê kar û keyeyî dayê înan û vat: "Hêvî dayî mi la çîyêk nêkerdî. Ma semedê demêk keye de mendî la ma nêeşkabî 650 lîra kira bidayîne. Semedê ez tûtanê xo bigîra, hewceyê bi keyeyê bi hacet û hewcedarî bi karêk esto."

 

'Rastê bêtêduştî ameya'

 

A.A peynîya qiseykerdişê xo de wina vat: "Ez bi endîşe ya ke nêeşka tûtanê xo bigîra. Çîyê ke ma hewnê xo de nêdîyo, ma ra yeno waştene. Ma bi konteynir bawer bî, ma vat ma binê sîwanê dewlete de yê, do hetkarî bida ma. Semedê her kesî hezar û 100 lîra dayî. La pêwa ke mi muracat kerd zî nêdayî. Çîyêk bêro serey mi, ez bikewa rayîrê xerab berpirsîyar dewlete ya. Dayîşê qutîyêk xidar hetkarî nîyo. Konteyniran de ma eştî quncikê tewr dûr. Semedê ma kesî nêrehet nêkerê, bêtêduştî kerdî."