Oznur Deger

 

ENQERE - Rêxistinê huqûqî derheqê grevê vêşanîye yê bi amancê ke tecrîdê serê Rayberê PKKyî Abdullah Ocalanî ra bêro wedaritene, ame destpêkerdene û  roja 201 de dewam keno de veng dayî û vatî: "No polîtîkayê tecrîdî, destpêkê polîtîkayê ke komelî bi polîtîkayê tecrîdî rayîra beno yo. Ganî tecrîd bi peynî bibo."

 

Grevê vêşanîye hetê tepişteyan ra bi amancê wedaritişê tecrîdê serê Rayberê PKKyî Abdullah Ocalanî û binpaykerdişê heqan bêrê wedaritene, 27ê teşrîna peyêne de ame destpêkerdene, roja 201 de yo. Îqtîdar ke waştişê tepişteyan nêvîneno, binpaykerdişê heqan yê zîndanan zî zêde keno.

 

Endama Komeleya Huqûqnasê semedê Azadîye (OHD) avûkat Arzu Kurt, Endama Komîsyonê Komeleya Heqê Merdiman (ÎHD) Nuray Çevîrmen û endama Komeleya Huqûqnasê Hemdem (ÇHD) avûkat Ayşegul Çagatay derheqê çalakîya grevî de ercnayîş kerdî û dîyar kerdî ke ganî waştişê înan bi ca bêrê û tecrîd bêro wedaritene.

 

'Tecrîd binpaykerdişê heqan o'

 

Endama Komîsyona Zîndanan a ÎHDyî Nuray Çevîrmen dîyar kerd ke zîndanan de binpaykerdişê heqan yenê ciwîyayîş û vat: "Tecrîd, binpaykerdişê heqan ê sereyîn o. Tepişteyî bi amancê wedaritişê tecrîdî kewtê grev. Demê peyîn de binpaykerdişî zêde bîyê. Rewşa tepişteyê nêweşan giran bena. Sewqê nêweşxaneyî nînê kerdene. Semedê pandemî tepişteyî xeylêk heqan ra bêpar yenê verdayîş.  Tecrîd problemêk girîng o. Pêwa pêro hewldayîşan îqtîdar hemleyêk pozîtîf nêerzeno. Ma zî wazenê ke tecrîd peynî bibo. Pêro binpaykerdişê zîndanan peynî bibê."

 

'Tedayê serê şarî tesîrê zîndanan keno'

 

Avûkata ÇHDyî Ayşegul Çatatay zî wina vat: "Tecrîdêk giran yeno kerdene. Astengkerdişê sohbet, pêvînayîş, cezayê hucre û nêdayîşê weşanan roj bi roje zêde benê. Tecrîdê serê tepişteyan bîyo sey polîtîkayê çinkerdişî. Heta ma teber de çîyêk nêkerê, do tepişteyî bi bedenê xo têkoşînê xo dewam bikerê. Grevê vêşanîye hîn tewr dergî virazyayî. Ma muwekîlanê xo vinî kerdî. Nika grev dewam keno. Grev, bêdem û bidor o. Merdimî vanê qet zirar nêdano weşîye? La wina nîyo. Esas de zirarêk pîl, texrîbatêk pîl ser de keno. Ganî lezabez waştişê tepişteyan bi ca bîyarê. Tecrîd, tewirêk îşkenceyî yo. Ganî peynîya ci bîyarê."

 

‘Polîtîkayêk taybet yeno kerdene'

 

Avûkata OHDyî Arzu Kurt zî  dîyar kerd, waştişê tepişteyan oyo ke tecrîdê Îmraliyî bêro şiknayene û vat: "Nê waştişî, pêkerdişê mîyanneteweyî û qanûnê bîyaye de heqê sereyîn ê. La heqê tewr sereyîn yenê astengkerdene. Bi vurnayîşê qanûnê înfazî dir tepişteyê sîyasî teberê ci de ameyî girewtene. Prosesê pandemî de pêwa îtîrazanê ma, tu gamî nêameyî eştene. No zî ramojneno ke vera tepişteyê sîyasîyan polîtîkayêk taybet yeno kerdene. Ganî tecrîdê Îmraliyî bêro şiknayene û peynîya binpaykerdişê heqan ê  hemverê tepişteyan bêro dayene. Destpêkê polîtîkaya înan, bi tecrîd rayîrberdişê komelî yo."