Hîkmet Tunç

 

WAN - Cuya maya aştîye Muhteber Bor pirî bi têkoşîn a. Bi vindertiş, bi qerar û bi înad çalakîyan de tewr vernî de ca girewtêne û seranserê cuya xo de bi qerarêk pîl têkoşînê xo dewam kerd.  

 

Maya Aştîye Muhteber Bor (60) pêwa emrê xo her şert û mercî de hemverê zulmî tewr vernê de bî û 10ê Hezîrane de netîceyê krîzê qelbî de dinyaya xo bedilnaye. Tûtêkê Muhtebere tewrê PKKyî beno û dima ra dinyaya xo bedilneno. Tûtêk ci zî 27 serrî yo tepişte yo. Muhtebera ke tûtanê xo dir heta peynîya cuya xo ware terk nêkerd, waya ci Safîye Bor têkoşînê aye qal kerd.

 

Cenazeya tûtê xo nêdî

 

Muhtebere Feraşîno ke girêdayê Elkê yê Şirnexî de yena dinya û serranê 90î de semedê tedayê dewlete aye zî sey bi hezaran Kurdî wareyê xo ra bena. Semedê koçberî yena taxa Xaçort ê qezaya Îpekyolî ya Wanî de bi ca bena. La dewlete înan tîya zî rehet nêverdana. Semedê tedayê dewlete di tûtê aye ke şinê lîse, tewrê PKKyî benê. Lajê aye pîl Fuat Bor netîceyê îxbarêk de cezaya muebetî yena birnayene û 27 serrî yo tepişte yo. Lajêk bîn zî 2018 de Şirnex de pêrodayîşêk de dinyaya xo bedilneno. Muhtebere xebera lajê xo televîzyon ra gêna. Serê zanayîşê ke bidest kena, bi serran muracatê dozgerî û sazgehê têkildar dana û wazena cenazeya lajê xo bigîra. La cenazeya lajê xo nêvînena.

 

4 serrî bi ke lajê xo yê tepişteyî nêdî

 

Muhtebere ke polîtîkayê înkar û îmha kûr r aciwîya. Pêwa pêro tedayan tewrê çalakî û bernameyê wareyan bî. Muhtebere ke wayîrê  karekterêk xurt bî, pêwa emr, bi vindertiş û cesaretê xo tesîrêk pîl serê kesê derûdorê xo kena. Pêwa heme polîtîkayan teda û zulmî, aye bi hesretê aştîye ciwîya û 4 serrî bi ke nêeşkayîne şêro pêvînayîşê lajê xo yê Fuatî.

 

 'Xeyalê ci nimcet mendî'

 

Safîye vat, Muhtebere di serran de vernê de tûtê xo dima ra zî mêrdeyê xo kanser ra vinî kerd û vat: "Rojêke rehet nêdî. Nêciwîya. La pêwa her çî xeylêk bi cesaret bî. Tewrê pêro çalakîyan bî, tewrê 8ê Adare, Newroze bîne. Cepheyê tewr vernê de ca girewtêne. Hîsê xo qet nêdayîne teber. Mi qet nêdî ke aye berma. Dejê xo eşt zereyê xo. Reyan mi vatêne, 'biberme, wa zerrîya to veng ba' vatêne, ‘Ez mayêka Kurd a.' Sey her maya Kurd, xeyal û hesretê Muhtebere zî nîmcet mend."

 

'Do tûtê ma aştîye bivînê'

 

Safîye tewr peyîn wina vat: “Gelo do no şer heta key dewam bikero. Hema çend kesî do aştî nêvînê û bimirê. Ganî kurdî bibê yew. Ma nêvînê zî do qetî tûtê ma aştî bivînê. Ez bi heme qelbê xo bawer kena."