Derya Ren

 

RIHA - Emîne Şenyaşar ke mêrde û di lajê ci hetê merdim û pawitoxê parlamenterê AKPyî Îbrahîm Halîl Yildiz ra ameyî qetilkerdene, 4in serrgera qirkerdişî de qisey kerd. Emîne wina vat: "Yê ke tûtê mi qetil kerdî, Pirsûs de serbest gêrenê. Mi vat, belkî edalet binê betonî de yo, ez bikolî û vejî. La edalet çinbi. Na dewlete dir edalet çin o, tena zulm esto."

 

Qezaya Pirsûsê Rihayî de vernîya weçînayîşê 28ê Adara 2018 de 14ê Hezîrane de, Haci Esvest Şenyaşar û lajê ci Adîl û Celal Şenyaşar hetê merdim û pawitoxê parlamenterê AKPyî Îbrahîm Halîl Yildiz ra ameyî qetilkerdene. Serê nê serebûtî ra 4 serrî derbas bi. Fadil Şenyaşar ke serebûtî de pî û di birayê ci ameyî kiştene, roniştişê peyîn yê 2ê Nîsane de ame vînayene de 37 serrî û 9 mengî cezaya zîndanî ci rê ameye birnayene. Birayê parlamenterê AKPyî Enver Yildiz zî ci rê 18 sal ceza ame dayene. Emîne Şenyaşar ke mêrde û di lajê ci ameyî kiştene û lajê ci Ferît Şenyaşar serebûtî de birîndar xelas bi, semedê edaletî têkoşînêk pîl danê. La her rey dest veng agêrenê.

 

Nobeta edaletî dayî destpêkerdene

 

Keye 9ê Adare de verê Edliyeyê Rihayî de dest bi çalakîya roniştişî kerd. Emîne û Ferît Şenyaşar 4in menga çalakîye de yê û nê prosesî de 4 rey ameyî destbendkerdene. Roja ke çalakî dayî destpêekrdene, xeylêk kesî, sazgehî semedê paştdayîşî şî serdayîşê înan. Emîne Şenyaşar 4in serrgera qirkerdişî de qisey kerd.

 

'Bermiş ra çimê nêdîne'

 

Emîne vat, vernîya qirkerdişî keyeyê ci bi hizûr ciwîyayo û vat: "Ma pêro awanîyêk de roniştêne. Serê sibayî şîne karê xo, şan de ameyîne. Reyan tûtê mi semedê tope kay bikerê şîne teber. Dimayê ke tûtê mi ameyî qetilkerdene, mi a tope nimite. Roja ke qirkerdiş virazyayo, hewn nêkeweno çimanê mi. Dermanê hewnî dayê mi ke ez rakewî. Bermiş ra çimê mi tarî bîyê. Ganî ez emelîyat bikera. Semedê mi cuye nêmende. Mi vat belkî edalet bêro, semedê nê hîrê mengî yo verê edlîyeye de ya û ma kewtî aşma 4ine. Lajê min bîn tepişte yo, hucreyê yew kesî de yo. Kesê ke tûtê mi qetil kerdî, Pirsûs de gêrenê. Bêguna tûtanê mi qetil kerdî."

 

'Edalet çin o'

 

Emîne qiseykerdişê xo wina dewam kerd: "Vernîya serebûtî tu nêweşîyê mi çinbî. La dimayê qirkerdişî, nêweşîya qelbî mi de vejîya, çimê mi tarî bî. Heme keyeyê mi vila bi. Ez û di lajê mi mendê. Tûtê mi qedênayê. Ez qedîyaya. Lajê mi tepişte yo. Her rey ez şina pêvînayîş ez fam kena ke dewlete çin a. Edelet çin o. Ma muracatê her cayî kerd, la edalet çin o. Mi vat belkî edalet binê betonî de yo, ez bikolî. Mi vat belkî edalet binê temelê edlîye de yo. La ez şşîya ûca de zî çinbi. Mi vat, belkî lajê mi vera bidê la edalet çinbi. Bi aşman o verê edlîye de ya. La bi ca nêame. Ma serê sibayî Pirsûs ra kewenê rayîr. Xeylêk rey bê sebeb ma ameyî destbendkerdene. Dima ra m avera danê. No welatî de tena zulm esto. Dozgerî ber padano, ma nêgîno zere"

 

Emîne derheqê qirkerdişê ke nêweşxane de ameyo ciwîyayîş de qisey kerd û vat: "Dozgerî ma goşdarî nêkeno. Çira qeydanê ma nêvejenê? Ez tîya nişnena ro, semedê edaletî. No dej do mi bikişo. Çira tûtê mi qetil kerdî? Lajê mi kes nêkişt. Yê ke tûtê mi qetil kerdî, Homayî ra bivînê. Wa lajê min o tepişte vera bidê. Ez bi xeyrê lajê xo serê lingan de ya."