WAN - Cinîyê ke Wan de ciwîyenê bale antî serê çalakîya grevê vêşanîye ya tepişteyan ke kewt roja 200yî û veng dayî hetgirê demokratîkan ke waştişê tepişteyan bi vengêkê berz bîyarê ziwan.

 

Tepişteyê PKK û PAJKî bi amancê tecrîdê serê Rayberê PKKyî Abdullah Ocalanî ra bêro wedaritene û binpaykerdişê heqan ê zîndanan peynî bibê, 27ê teşrîna peyêne 2020ine kewtî grevê vêşanîye yê bêdem û bidor Grev roja 200ine de yo. Derheqê waştişê tepişteyan de selahîyetdarê hukmatî û wezerata dade tu çîyêk nêkenê û Tirkîya û xeylêk welatê dinya de derheqê babete de çalakî û bername yenê kerdene.

 

Wan de ma bi welatijan, sîyasetmedar û temsîlkarê Rêxistinê Komelê Sivîl (STO) dir rewşe ercna.

 

Cinîya bi nameyê Necla Tartan dîyar kerd ganî problemê kurdan bi metodê aştîyane bêrê çareserkerdene û vat: "Wa êdî şer peynî bo. Tedayê AKPyî serê kurdan werte de yo. Her kes nê zulmî vîneno. Ma veng danê pêro cinî û mayan; vera zulmî vengê xo berz bikerê. Ma peynîya grevan bîyarê.”

 

'Waştişê tepişteyan waştişê ma yê'

 

Endama Komeleya Paştdayîşî û Hetkarîya Keyeyê Tepişteyan (TUHAY-DER) Edîbe Babur dîyar kerd waştişê tepişteyan waştişê înan o û vat: "Ganî pêro sazgehî û selahîyetdarî bi hîsgêrî têbigeyrê. Netîceyê grevê vernî werte de yo. Xeylêk cenazeyî zîndanan ra vejîyayî. Ma nêwazenê nê grevî bi merdişan netîce bibê. Ganî waştişî bi ca bêrê. Hemverê bêhuqûqî û bêdadî, ramojnayîşê reaksîyonî, merdimayî yo. Waştişê tepişteyan waştişê ma pêrûne yo."

 

'Hemverê nêheqî grev de yê'

 

Îdarekara HDPyî ya Wanî Leyla Atsak zî wina vat: “Embazê ma pêwa pêro bêîmkanîyan bedenê xo dayê verê mergî. Hemverê nêheqî û binpaykerdişan kewtî grev. Ganî ma kanalê demokrasî tewr zêde bidê zor. Ganî her kes wezîfeyê xo bi ca bîyaro, veng bido grevan.”

 

'Ganî hemverê tecrîdî ma vengê xo berz bikerê'

 

Parlamentera HDPyî ya Wanî Muazzez Orhane wina qal kerd: "Amancê esas ê grevan oyo ke polîtîkayê tecrîdî ke tesîr serê pêro welatî kerdo, bêro teşhîrkerdene. Tecrîd sere de Îmrali de hemverê Birêz Abdullah Ocalanî de yeno kerdene. La tena bi zîndanan nêmaneno. Tesîr serê heme wareyê cuye de kerdo. Yewin çareserî oyo ke ganî merdim vera nê polîtîkayan reaksîyon ramojno. Sere de cinî, ciwanî, kedkarî û heme şarî vera  polîtîkayê tecrîdî vengê xo berz bikerç û bi çalaîya xo nê polîtîkayan veng vejê.”

 

'Cayê ke huqûq çinbo ganî demokrasîyê şarî bikewo dewre'

 

Hemsereka DBPyî Gulderen Varli zî wina vat: “Ma ferqê heme polîtîkayê îqtîdarî de yê. Verê zî bi desan rey tepişteyî kewtî grevê vêşanîye. Yê ke dinyaya xo bedilnabî estbî. La îqtîdarî polîtîkayê nêçareserî û tedayî her ware de kerd dewre. Ganî vera nê vengê ma berz vejîyo. Ganî ma platformê hîra de îtîrazê xo bîyarê ziwan. Ez veng dana heme kesanke wayîrê grevan vejîyê."