Medya Uren

 

MÊRDÎN - Maya tepişteyê sîyasî Hesîne Dogan, derheqê tecrîdî de ercnayîş kerd. Hesîne dîyar kerd ke tepiştişê lajê ci huqûqî nêyo û vat: "Eke ma cuya xo ra biewnê, ma do bivînê ke ma pêro tecrîd de yê. Tepiştişê lajê mi, huqûqî nêyo. Şert û mercê nika ci de yê, xirab ê. Bi 5 serrî yo ey nêvînena. O û embazê xo pêro bînê tecrîdêk giran deyê."

 

Tecrîd û binpaykerdişê heqan ê zîndanan û bi taybetî zî serê rayberê PKKyî Abdullah Ocalanî de yeno kerdene, her ke şino zêde beno û hukmatê AKPyî na babete de bêvengîya xo paweno. Hemverê nê, tepişteyê sîyasî 199 rojî yo grevê vêşanîye yê bêdem û bidor de yê. Nê çalakgeran ra yew zî Mesut Dogan o û 10 serrî yo Zîndanê Tekîrdagî de yo. Mesut Dogan ressam û karker bi. Emrê xo yê 19 serrî de yeno tepiştene û 93 serrî ceza ci rê yena dayene. Maya ci Hesîne Dogan vîrameyîşê xo lajê xo qal kena û vana her wext ê tecrîd de ameyê verdayene. Sewbîna Hesîne dîyar kerd ke lazim o destûrê pîlbîyayîşê tecrîdî nêdê.

 

'O ressam o' 

 

Hesîne Dogan serê tecrîdî de ajansê ma rê qalê lajê xo û tepiştişê ci kerd. Hesîne wina qal kerd: "Ma keyeyê feqîr ê û ma tûtanê xo şertê xidar de wey kerd. Tûtê ma kesê veradaye nîyê. Xo nas kenê û dinyaya xo zî nas kenê. Belê lajê mi Mesut, dimayê ke mektebê mîyanên qedêna êdî hew şi mekteb. Pî û birayê xo dir karê viraştişê awanîyan de û sewbîna bi tîcaretî dir eleqedar bîne. La verê pêro çî ressamêk jîyatî bi. Dimayê emrê ci bi 19 salî ame tepiştene û 2 rey cezaya muebetî birnayî."

 

'Ey zirar nêdayîne tu kesî'

 

Hesîne dîyar kerd, lajê ci hîrê rey ameyo surgunkerdene û vat: "Hunermendî tu wext zirar nêdanê kesî. Ez ey nas kena, kesêk zaf hîsgêr bi. Nika bi qetilkerdiş yeno sucdarkerdene. Wextê ey tepiştî ma demêk derg ey ra xebere nêgirewt. Nêverdayîne keye û avûkatî ey bivînê. O wext îşkence bi ci kerdî. Hîrê rey surgun kerdî. Nika zî Zîndanê Tekîrdagî de yo. Bi 5 serrî yo semedê îmkanê ma çin ê, rew ra yo mi ey nêdîyo. Nêzdî bîne ez o bişîne. Ez nika persena, gelo no tecrîd nîyo? Zere de bi hezaran problemî vejênê. Yew zî problemê   înan ê weşîye yo. Nika bi seyan embazê înan eynî rewşe de yê. Bêsuc zîndanan de yê."

 

'Êdî bêveng memanê' 

 

Hesîne tewr peyîn wina vat: "Ma kesê feqîr ê. Şîyayîşê zîndanî ma rê problem o. Verê nê de ma her aşme ci rê pere zî şawenê. Ma zî mexdûr ê. Ma maye yê semedê kewenê endîşe. Eke no tecrîd nêro şikinayene, êdî cayê ma tu cayêk de nêmano. Ma tena aştî wazenê. Amancê înan oyo emrê heme tepişteyan zere de şêro. Ma hêvîya xo ameyîşê lajê xo ra birnayo. Semedê tecrîd bêro peynîkerdene çi gerek bikero ma do bikerê. Tecrîd suc o, tecrîd sucê merdimayî yo. Êdî bêveng memanê."