ENQERE - Serdozgerîya Komara ya Dadgerî bi waştişê padayîşê HDPyî reya diyîn îdianame amade kerd. Cinîyan ercnayîş kerd û vatî: "Têkoşînê hemverê hewldayîşê padayîşê HDPyî, semedê têkoşînê demokrasî ferz o."

 

Serdozgerîya Komara ya Dadgerî semedê padayîşê HDPyî reya diyîn îdianame amade kerd û erşawitî Dadgeha Desturê Bingeyîn. Îdianameyê ke 850 rîpelê yo, derheqê 500 sîyasetmedaran de qedexeyê sîyasî, birnayîşê hetkarîya xezîneyî yê semedê partîye û sewbîna desteserkerdişê hesabê bankayî yê partî waşt. Reaksîyonê hemverê hewldayîşê padayîşê HDPyî dewam keno.

 

'Tesaduf nîyo'

 

Sereka Pêroyî ya Partîya Şorişgêrî Elîf Torun Oneren, dîyar kerd ke her kes hemfikirê ke serdestîyê îqtîdarê faşîst nêeşkeno bidomno û vat: "Îqtîdar hetê komelî ra paşta ci işta qels bîyo, welat krîzêkê pîl yê sîyasî û ekonomî de yo. Feqîrî, betalî û teda zêde bîyê. Heto bîn zî çeteyê muteahîtiyê 5 kesan ra yenomeydan, pîya kewenê îhaleyî û demê peyîn de munaqeşeyê dewleta mafyayî berz bîyê estê. AKP û MHPyî pêrodayîşê parekerdişî bi hawayêke eşkera veto werte. HDP zîncîra ewil ya dînamîkê komelî de ca gêno. Îqtîdaro faşîst ke kewt tengî, muracatê argumananê cîya keno. Reynakerdişê akerdişê dewa rastê tarîxê 7ê Hezîrane ame. La no tesaduf nîyo."

 

'Ma bi HDPyî dir paştdayîş de yê' 

 

Sereka Pêroyî ya Keyeyê Şarî Nebîye Mertturk, dîyar kerd ke îqtîdar demêko derg o krîz de yo û vat: "Semedê awanbîyayîşê newe ra dewlete û krîzê kontrgerîla, hêrişî vernê de hemverê kurdan de yenê kerdene. Bi vatişê ‘welat, şar, ale’ şarî serê netewperestî de xapênenê û la ma êdî eşkenê vajê ke hesabê înan pê nêgînê. Serê HDPyî de wazenê muxalefetî bitersnê. Ma do her wext bi şarê kurdî û HDPyî dir paştdayîş de bê. Ganî ma pîya têkoşîn bikerê."

 

'Îqtîdar hewl dano ke paştdayîşê şarî ke qels bîya, newe ra bigîro'

 

Temsîlkara Serekatîya Pêroyî ya Partîya Kede (EMEP) Selma Gurkan bale ant serê vîdeoyanê Sedat Pekerî û vat: “Vîdeoyê ameyê weşanayene vejîya werte ke îqtîdar  sîstemêkê senîn yê talan û xirakerdişî awan keno. AKP yo ke demêk derg o, hewl dano rejîmêk faşîst awan bikero hewl dano bireso hedefê xo. Demêk derg o hewldayîşê padayîşê HDPyî ardê rojeve. Nê demê ke munaqeşeyê weçînayîşî zî ameyê rojeve, alarm dayî. La ma eşkenê vajê ke nê hewldayîşê, girêdayîşê hewldayîşêkê weçînayîşî nîyo. Girêdayê hedefêkê rejîmê sîyasî yê otorîterî yê îqtîdarî yo. Muracatê diyîn 7ê Hezîrane de ame kerdene, balkêş o. Îqtîdar 7ê hezîrane xo vîr ra nêkerdo. Têkoşînê hemverê hewldayîşê padayîşê HDPyî semedê têkoşînê demokrasî ferz o."