RIHA - Çalakîya nobete ya Emîne û Ferît Şenyaşar ke bi waştişê "edaletî" dabî destpêkerdene, roja 94ine de dewam keno. Labelê selahîyetdarî hemverê waştişan hema bêveng ê.

 

Emîne Şenyaşar ke mêrde û di lajê ci hetê merdim û pawitoxê parlamenterê AKPyî Îbrahîm Halîl Yildiz ra ameyî qetilkerdene, pêwa lajê xo Ferît Şenyaşar ke eynî hêrişî de birîndar bi, 94 rojî yo semedê edaletî nobete de yê. Emîne û Ferît ke serê sibayî ameyî verê edlîye dowizê "edalet" ser de amebî nuştene dayî erd û dest bi nobeta xo kerdî.

 

Keyeyî serê hesabê xo yê twittirî de Wezîrê Dade Abdulhamit Gul, Wezaretê Dade, Baroyê Îzmîrî, Baroyê Enqereyî etîket kerd û vat: "Wa Dosyaya Qirkerdişê Nêweşxaneyê Dewlete ya Pirsûsî bêra akerdene! Kam sucdar o wa hesab bido! 3 serrî verê 3 merdimê ma ameyî qetilkerdene û tu selahîyetdar nê înkar nêkerd. Ma dozgerê bi cesaret yê ke eşkenê nê lazimî bi ca bîyarê wazenê."