Derya Ren

 

SEMSUR - Karkerê ramitişî yê keda înan yena binpaykerdene, dîyar kerdî ke omidê înan hukmatî rê nêmendo û vatî ê vindî kenê.

 

Krîzê ekonomî Tirkîya de roj bi roje giran beno û merdimî ameyê sewîyeya ke nêeşkenê boya xo bigîrê. Sey her wareyî krîzê ekonomî tesîrê xo serê wareyê ramitişî zî kerd. Karkerê cinî yê wareyê ramitişî de xebityenê, hemverê fehmê serdestî yê camêrdan zî têkoşîn kenê. Pêwa ke hukmatî ra paştdayîş nêgînê, heqê keda xo zî nêgînê.

 

Bajarokê Bulamî yê Çêlîkhanê Semsurî, cinîyê tutinî xebityenê, zor û zehmetî ciwîyenê qal kerdî.

 

'Mecbûr a bixebitya'

 

Sanîye Horoz dîyar kerd ke şefeq ra wirzenê û vat: "Ma tûtanê xo tena keye de verdenê. Semedê ma tena verdenê, bermenê. La çîyêk bikera çin o. Ez înan tena nêverdana, do vêşan bimanê. Rewşa ma goreyê karkerê mewsîmî tewr baş o. Semedê rewşa înan tewr zehmet a. Ez tîya ya. Nêzdîbîyayîş asan o."

 

‘Kes nêame rewşa ma pers nêkerd'

 

Sanîye dewam de vat, omidê şarê herême hukmatî ra nêmendo û vat: "Omidê mi hukmatî ra çin o. Semedê heta nika ma çîyêk hukmat ra nêgirewto. Ez nika herêma ke AKP qezenc keno de, ciwîyena. La merdimî vanê, 'ma çira wina bîyê, ma çira na rewşe de yê.' Serra vîyarte de awa ma çinbî. La kesî rewşa ma pers nêkerd. Ma rewşa xo selahîyetdaran ra vanê, la vanê ma aciz mekerê."

 

Sanîye dewam de wina vat: "Hukmat semedê kesê pereyê înan estê, her tewir hetkarî dano. Nimûne; aşî. Ganî her kes bêro aşîkerdene l ama ewnîyenê ke êyê ke pereyê înan estê yenê aşîkerdene. La yê ke pereyê înan çin o, mehkumê êergî yenê kerdene. Hukmato bîyaye zî bi pere qisey keno. Semedê hetkaranê xo seferber beno. Omidê ma hukmatî rê çin o. Ma her roje vindî kenê."

 

'Wa hukmat bivuryo'

 

Sanîye qalkerdişê xo wina dewam kerd: "Ganî sîstem bivuryo. Ganî partîyê muxalefetî zî xo rast bikerê. Goreyê mi HDP zî nika hemverê çîyê ke yenê ciwîyayîş de bêveng mendo. Ganî partîyê sîyasî mîyanê şarî de bê. Dewlete prosesê pandemî de hezar lîra da merdiman. Eke merdimî hewce nêbîne, o pere nêgirewtêne. La merdimî hewcedar ê. Ganî hukmat no bifikrîyo."

 

'Cinî her wext yenê pelçiqnayene'

 

Elîf Buyuktaş zî dîyar kerd ke serê sibayî heta şan de erdê tutinî de xebityenê û vat: "Ma cinî şefeq ra heta şan de xebityenê. La ma qîmet nêvînenê. Camêrdî her wext xo serê ma ra vînenê. Cinî yenê pelçiqnayene. Ma bi camêrdan dir şinê mîyanê erdî gama ke ma şan de yenê keye, ê xo derg kenê û ma mecbûr manenê werd amade bikerê. Ma rincan benê. Her çî dir ma eleqedar benê. Keda cinîyan nîna vînayene. Pêro wextê ma bi xebate derbas beno. Têduştî çin o."