Oznur Deger

 

ENQERE - Vernîya dewaya ke 33 cinî ameyîne muhakamekerdene, ame waştene eşkerayîyêk bêro dayene la cinî ameyî derbkerdene û destbendkerdene. Cinîyan dîyar kerd ke ê fek Pêkerdişê Stenbolî ra vera nêdanê û vat: "Çîyê ke ma uca de dî no bi; dewlete şikdarê şîdetî ya û şîdet meşrû kena."

 

12ê tebaxa 2020ine de Platformê Cinîyan ê Enqereyî qezaya Çankaya ya Enqereyî, taxa Kolejî de çalakîya "Pêkerdişê Stenbolî" kerdî. La cinî rastê mudaxaleyê şîdetî yê polîsan amebî. Mîyan de muxabira Ajansê Mezopotamya (MA) Eylem Akdag zî estbî, 33 cinî amebî destbendkerdene. Dimayê îfadeyî cinî amebî veradayene û hetê dozgerîye ra cipersayîş amebi destpêkerdene û muxalefetê "qanûnê rayrayîşê nawitişî û kombîyayîşî" de madeyê 2911 de  îdianame ame amadekerdene. Yewin roniştişê dewa 7ê hezîrane de 28in Dadgeha Cezaya Asliyeyê Enqereyî de ame vînayene.

 

Vernîya roniştişî cinîyê ke waştî verê Edliyeyê Enqereyî de eşkerayî bidê rastê mudaxaleyê şîdetê polîsan ameyî û 8 cinî ameyî derbkerdene û destbendkerdene. Cinîyan vera nê reaksîyon ramojna.

 

'Dewlete şikdarê şîdetî ya' 

 

Endama Torra Pawitişê Cinîyan Tugba Koçer zî yena muhakemekerdene û verê edliye de ameye derbkerdene wina vat: "12ê tebaxe de semedê pawitişê Pêkerdişê Stenbolî ma waşt ke ma zîncîrêk awan bikerê. Polîsan ma destbendkerdî û dima ra dewa ameye akerdene. Nika semedê dewa ma waşt ke ma eşkerayî bidê la reyna ma rastê mudaxaleyê şîdetî ameyî. Ma ameyî destbendkerdene û derbkerdene. Cinîyê ke dewa ra ameyîne muhakemekerdene, nêgirewtî edlîye. Çîyo ke ma uca de dî no bi; dewlete şikdarê şîdetî ya û şîdet meşrû kena. Çiqas hêriş bikerê zî ma fek cuye û Pêkerdişê Stenbolî ra vera nêdanê. Ma do heta 1ê temmuze kuçeyan de bê û fek Pêkerdişê Stenbolî ra vera nêdê."

 

Torra Pawitişê Cinîyan ra Aysun Gençtanir zî ke eynî dewa ra yena muhakemekerdene, dîyar kerd ke  heme sazgehê dewlete de serdestîyê camêrdan esto û vat, ê bi sazgehêkê şîdet weçîneno dir rî bi rî yê. Dimayê hêrişê vernê yê hemver Pêkerdişî ma vejîyayî kuçeyan. No pêkerdiş netîceyê têkoşînê cinîyan de bi ca ame. Hêrişê hemverê pêkerdişî ne munferît yan zî tesaduf ê. Pey de sebebê polîtîk estê."

 

'Dewlete êdî bîya rêxisyinê sucî'

 

Aysune dewam de vat: "Tolga Agar, Şîrîn Unal parlamenter ê. Parlamenterê AKPyî yê û kiştox ê. Welat de kiştoxî rehet gêrenê.  Pêkerdişê Stenbolî dewlete ra vano e do kiştoxî bêrê muhakemekerdene. Wexto ke ma şinê îfade, hêzê asayîşî hêriş kenê û vanê şima do nêeşkê şêrê îfade. Dewaya ke akenê binpay kenê. Madeyê 9ine ê Pêkerdişê Stenbolî de vano ke dewlete bi sazgehê  komelê sivîl û cinîyan dir hemkarî bikera. La ma vînenê ke nê werte ra darenê we. Cinîyan hedef ramojenê, hêriş kenê. Dewlete bîya rêxistinê sucî."

 

'Pêwa hêrişan do têkoşîn dewam bikero'

 

Endama Torra Pawitişê cinîyan ra  Gîzem Unsal ke eşkerayî de kuyayîş werd wina vat: "Embazê ma yê ke bişîne dewa, bi îşkence ameyî destbendkerdene. Ma tu wext fek pêkerdişê Stenbolî ra vera nêdanê. Pêwa hêrişê polîsan do têkoşînê ma dewam bikero. Ma 26ê Teşrîna Peyêne de semedê paştdayîşê embazanê xo reyna Edliyeyê Enqereyî de bê."