Gulîstan Azak

 

DÊRSIM - Karkerê mewsîmî yê semedê xebate şî bajarokê Perî yê Mezgîrtê Dêrsimî, şertê pandemîye de çadirê 20 metrekare yê bêawe û cereyan de têkoşînê cuye danê.

 

Karkerê mewsîmî yê ke mecbûr manenê serê kapasîteyê xo ra raywanî bikerê, çadirê bêawe û cereyan de, şertên bê hîjyen de 12 saetan yenê xebitnayene û cuya xo 20 metrekareyî de sînor kenê.

 

Riha de pêwa ke bajarêkê ramitişî yo û ci de ramitiş nîno kerdene, bi hezaran merdimî mecbûr manenê karkerîyê mewsîmî bikerê û kewenê rayîrê koçberî. Bajarê ke xebityenê de zî nîjadperestî hêrişê înan kenê û pêwa heme  şert û mercê zehmetan xebityenê. Germbîyayîşê hamnanî de çadiranê qij de, keyeyê qelebalix bi ca benê û ne awe esta û ne zî cereyan esto. Nê şert û mercî bêguman rayîr ver bi nêweşîyan akeno û nêeşkenê xo vera nêweşîyan bipawê.

 

Welatijê Rihayî  ra ameyî bajarokê Perî yê Mezgîrtê Dêrsimî, eynî  şert û mercan de ciwîyenê.

 

'Awe û cereyan çin o'

 

Medîne Gozeten (27) derheqê probleman de qisey kerd û vat: "Cayê ke ma werd hadre kenê, nişnenê ro tena 20 metrekare yo. Wextê ke varan vareno, ma xeylêk zehmetî ancenê. Ne cereyan ne awe esta. Gelo na cuye ya? Karsazî awe bi tankêran anê. Ma bi bîdon û satilan awe benê çadiran. Tankêrê awe hemverê rayîrî yê. Rayîr cit şerîd o. Wesayîtî bi lez derbas benê. Ma tehluke danê verê çiman û awe anê. Ma werdê xo zî serê adirî de viraznenê."

 

'Semedê cinîyan hîna zehmet o'

 

Buşra Çîftçay zî dîyar kerd ke karkerîya mewsîmî semedê cinîyan xeylêk zehmet a û vat: "Cayê ke ma xebityenê heme lazimî ma bi ca anê. Ma hem serê erdî de hem zî şan de xebityenê. Werd, cilî, firaq, tûtî. Heme bar serê milê ma de yo. Dayîkî zaf zehmetîyan ancenê. Dergûşê ma serê erdan de serdî ra, tîjî ra, herre ra tesîr benê. Xeylê dergûşî semedê nê nêweş kewenê."

 

Bajar bi bajar gêrenê

 

Nurcan Çîftçay (20) zî dîyar kerd ke her bajarêk de aşmêk manenê û vat: "Cayêk de bi pêroyî xebate çend mengan dewam kena. Ûca biqedîyo ma şinê cayêk bîn. Nimûne Gulane de karê kolane qedîya, ma hîn şî arêdayîşê komkerdişê gilyazan, hîn şî arêdayîşê mişmişan, hîn zî şî findikan. Bi kilmî keyeyê karkerê mewsîmî yê 7 mengan rayîran de yê û 4-5 bajaran vurnenê. Nîmeyê qezencê ma şino rayîr û lazimîyê. La ma mecbûr ê şêrê."