COLEMÊRG - Haci Baci Kaplan ya 58 serrî ke dewika Dotka ya Dirbêsanî ya Geverî ciwîyena, ked û rolê cinîyan ê viraştişê penîrî bi vaşî de qal kerd.

 

Dewika Dotka ke 90 keyeyî estê girêdayê dewa Dirbêsanî ya qezaya Geverê Colemêrgî de ya, cuye semedê cinîyan bi germbîyayîşê hewayî dir hîna zehmet bena û prosesê Bêrivanî dest pêkenê. Yew nê cinîyanê kedkar ra dewe de ciwîyena Haci Baci Kaplana 58 serrî ya. Haci Baci Kaplan 7 saetî viraştişê penîr û keda cinîyan qal kerd.

 

Weşikîya cuye û zozanê verê

 

Haci Baciye dîyar kerd ke cuya dewe xeylêk weş a û 30 serrî yo na dewe de cuyena û vat: "Verê ma şîne zozanan ma 3 aşmî mendêne. Ma hem şiwanî  hem zî ma ewnîyayîne tûtan ra. O wext 10 tûtê mi estibî. Mi tena înan rê ewnîya. Verê cuya dewe hîn weşêr bî. Nika ma şinê zozanê dûran. Ma bi wesayîtan şinê. Verê ma niştêne estoran û ma bi aşman çadiranê xo de mendêne."

 

'Cinî hetkarî danê yewbînan'

 

Haci Baciye dîyar kerd ke şinê zozanê ke 3 km dewe ra dûrî yê û vat: "Ma şit kenê penîr, mast, qeymax. Ma şitê ke zêde resnenê pê, ma danê cîrananê xo yê ke pesê înan çin ê. Ma cîranî hetkarî danê yewbînan."

 

Viraştişê penîrî

 

Haci Baciye wina vat: "Ma serê sibayî rew wirzenê û amadekarî kenê. Ma şit ancenê. Ma şit kenê beroşê pîlan. Dima ra sefênenê. Semedê şitê ma pak bo, ma di rey sefênenê. Ma dima kenê beroş û amîn kenê. 20 deqe ma pabeyê ci vindenê. Dima ra ma vaşê xo yê ke arêdayê kenê ci. Dima ra ma awa penîrê xo safênenê û penîr kenê turikan. Ma kerra danê serê turikan û di rojan wina bende manenê. Dima ra ma penîr birnenê û kenê bîdonan û kenê erd."

 

'Cinî her çî bi keda xo kenê'

 

Haci Baciye tewr peyîn vat, rojê înan bi  berîvanî û bi viraştişê berardişê şitî derbas beno û pêwa hende zor û zehmetî karê xo rê zaf hes kenê û vat: "Ma pêro karê xo bi xo kenê. Ma pes wey kenê, penîr û mast viraznenê. Cuya dewe weş a. Her çî ma xoxayî yo. Têkiliyê ma yê bi cîranan dir xeylêk weş o."