Şehrîban Aslan

 

AMED - Nûrcan Kaplan ke Tarik Kaplan bi çek hêrişê ci kerd û aye birîndar kerdibi, aye û dayîke aye vengdayîşê paştdayîşî cinî û selahîyetdaran rê kerdî. Nûrcane wina vat: "Şikdar semedê ke mi û dayîke mi qetil bikero ame. La nika ez  birîndar a û ciwîyena. Dimayê mergêmi ney, nika vengê mi bieşnawê."

 

Nûrcan Kaplan ke taxa Şehîtlîkî ya Yenîşehîrê Amedî de ciwîyena, hetê Tarik Kaplan ra bi çek ameye birîndarkerdene. Tarik Kaplan, Nûrcan û dayîka ci birîndar kerd û nika nêameyo tepiştene. Serbestmendişê şikdarî keye keno endîşe. Bi rayberîya Merkezê Heqê Cinîyan ê Baroyê Amedî serê medya komelî de bi hestagê “#FailTarıkKaplanYakalansın (Wa şikdar Tarik Kaplan bêro tepiştene)" vengdayîşê paştdayîşî ame kerdene.  

 

'Qerarê pawitişê estbi la binpay kerd'

 

Nûrcanê dîyar kerd ke 15 serrî bî zewicnayîbî la şikdar 8 serrî verê maeyo tepiştene û 4 aşmî verê ameyo veradayene. Nûrcane wina vat: "Ez şîya qerekole. Ez şîya xeylêk qerekolanê cîya. Mi gerre kerd. Semedê mi qerarê pawitişî  vetî. La her rey qerar binpay kerdî. Serebûtê şîdetê ra ez bi tûtanê xo dir 8 aşmî stargeh de mend. Dima ra ame tepiştene û şawitî zîndan."

 

'Dadgehe û polîsan çîyêk nêkerd'

 

Nûrcane wina vat: "Dosyayêk mi gerre kerdibi de pêwa ke qerarê nimte bi zî, mi bi zor berdî roniştiş. Tarik Kaplan zî eynî dosya ra muştekî bi. Zanayene ke do mi ûca de bivîno. Salona dadgehe de heqaret, tehdîd û hêrişê fîzîkî dest pêkerd. Pêwa nê çîyêk nêkerdî. Tena eştî teber. Veradayîşê bi kontrolî şikdar ame mi û dayîka mi  birîndar kerd. Semedo ke ez wazena fek ci ra vera bida, yeno dayîka mi birîndar keno. Mi û tûtanê mi rê wayîr nêvejîya. Mi waşt fek vera bida, la va ez do to bikişa. Ma merg ra xelisyayî. Çira hema zî nêameyo tepiştene. Çira her wext yeno tepiştene û yeno veradayene. Çira cinî her wext mecbûr manena xo binimna."

 

'Vengê mi bieşnawê' 

 

Nûrcane tewr peyîn veng da cinî û selahîyetdaran û vat: "Ez nêwazena bimira. Pêro cinîyê ke yenê kiştene vanê, ‘gelo dimayêmergî do wayîrê mi vejîyê.' Ez zî eynî çî vana. Dimayêmergî do wayîrê mi vejîyê û vengê mi bieşnawê."