RIHA - Nobeta edaletî ya Emîne û Ferît Şenyaşarî ke vanê, "Ma bi qerar ê, ma do edalet bîyarê" roja 91ine de dewam kena.

 

Emîne Şenyaşar ke mêrde û di lajê ci hetê merdimanê Parlamenterê AKPyî Îbrahîm Halîl Yildiz ra ameyî qetilkerdene, pêwa lajê xo Ferît Şenyaşar k eeynî hêriş de birîndar bi, çalakîya xo ya nobeta edaletî dewam kena. Çalakîya keyeyê Şenyaşarî roja 91ine de ya. Emîne û Ferît ewro ameyî verê edlîye û dest bi nobeta xo kerdî.

 

Do 5 rojan nobete bigîrê

 

Ferît Şenyaşar dîyar kerd ke cigêrayîşê înan yê edaletî 3 mengî pey xo de verda û vat: "Ma merg dayo verê çimanê xo. Ma bi qerar ê, ma do edalet bîyarê. Problemê weşîye yê maya mi her ke şinê giran benê. Tedawî zî qebul nêkena. Eke edalet bi ca bêro do maya mi tedawî qebul bikera. Ma tîy abi destek serê lingan de manenê. Ma wazenê merdimê hîsgêr destek bidê têkoşînê ma. Ma verê vatibi ma do hewte ra 3 rojan nobete bigîrê, la ma do êdî 5 rojan nobete bigîrê."

 

Emîne û Ferît dîyar kerdî ke ê do êdî hewte ra 5 rojî verê berê edlîye de nobete bigîrê û peynîya hewteyî de semedê qedexeyî do keye de nobeta xo dewam bikerê.

 

Keyeyî serê hesabê xo yê medyaya dîjîtalî de nê pare kerd: "Ma meşaleyê ADÂLETÎ verê Qesra Edaletî ya Rihayî de veşna. Wa tu çîyêk tarîtî de nêmano. Her versucê ke şima ceza nêdanê hîna bi hêz benê û zulm kenê. Bêrê! Ma verê  Qesra Edaletî ya Rihayî de nê zulmî ra vajê ney."