COLEMÊRG - Zahîde Kiliçoglu ke hîrê serrî yo nêeşkena şêra pêvînayîşê lajê xo Dilxaz Kiliçoglu ke surgunê Zîndanê Tîpê T yê Ereglîyê Konya rê ameyo kerdene, waşt ke lajê ci sewqê zîndanêk nêzdî bêro kerdene.

 

Tepişteyê PKK û PAJKî bi amancê ke tecrîdê serê Rayberê PKKyî Abdullah Ocalanî oeynî bibo, binpaykerdişê zîndanan peynî bibê dest bi grevê vêşanîye yê bêdem û bidor kerdibî û çalakî roja 194ine de dewam kena. Tedayê serê tepişteyan zî her ke şino zêde benê. Keyeyê ke tepişteyê înan surgunê şaristanê bînan yenê kerdene zî  zor û zehmetîyê pîl ancenê. Cinîya bi nameyê Zahîde Kiliçoglu ke taxa Cumhuriyetî ya Geverê Colemêrgî de ciwîyena zî nînan ra yew a.

 

Keyeyî nêeşkenê şêrê pêvînayîş

 

Lajê Zahîde, Dilhaz Kiliçoglu wextê qedexeyê tebervejîyayîşê kuçeyan ê Geverî de bi îdiayê YPSyij o ame tepiştene û cezaya muebetî dîyaye ci. Dilxaz ke 6 serrî yo tepişte yo, di serrî Wan de tepişte mend û dima ra surgunê Zîndanê Tîpê T yê Ereglî yê Konyayî rê ame kerdene. A roje ra nat, pêvînayîşê bi keyeyî dir ameyî birnayene. Keye, semedê problemê ekonomîye nêeşkeno şêro pêvînayîş, tena bi telefon têkilî de yo.

 

'Hîrê serrî yo lajê xo nêvînena'

 

Zahîde dîyar kerd ke 3 serrî yo nêeşkena şêra pêvînayîş wina vat: "Ez wazena lajê xo bivîna. 6 serrî yo tepişte yo. Tu sûcê ci çinbi. 3-4 roniştiş ame kerdene û cezaya muebetî dîya ci. Lajê mi Wan ra surgunê Konya kerdî. Dosyayêk cîya bîn zî esta. A dosya ra zî cezaya meubetî dayî. La hema a ceza nêameya tesdîqkerdene."

 

'Wa bîyarê şaristanêk nêzdî'

 

Zahîde wina dewam kerd: "Bi bahaneyêke gardîyanan lajê mi surgunê Konyayî kerdî. Semedê nê zî nêeşkena şêra Konya. Wextê lajê mi ame destbendkerdene, îşkence kerdî. O hema zî vîrê  mi de yo. Yewin waştişê mi oyo ke ez ey bivîna. Wa bîyarê cayêk nêzdî. Ez bizana ka lajê mi çi rewşe de yo. Semedê pandemî tepişteyê edlî vera dayî. Wa tûtî ma zî lezabez bêrê veradayene."

 

Zahîde tewr dîyar kerd ke semedê bêîmkanîyê ekonomîye nêeşkenê şêrê pêvînayîş û vat, wazena lajê xo bivîna.