RIHA - Emîne û Ferît Şenyaşar yê ke 9ê Adare ra tepya verê Edlîyeyê Rihayî de nobeta "Edaletî" dewam kenê wina vatî: "TC de welatijî edalet serê rîyê erdî de nêvînenê, coka binê erdî de edalet gêrenê."

 

Emîne Şenyaşar ke mêrde û di lajê ci hetê merdimê Parlamenterê AKPyî Îbrahîm Halîl Yildiz ra ameyî qetilkerdene, pêwa lajê xo yê Ferît Şenyaşar ke eynî hêrişî de birîndar bi, verê Edlîyeyê Rihayî de çalakîya xo ya nobeta edaletî dewam kenê. Çalakîya keyeyê Şenyaşarî roja 89ine de ya. Keyeyê Şenyaşarî serê sibayî ame verê awanîya edliye û dest bi çalakîya nobete kerd.

 

Keye semedê problemê weşîye yê Emîne Şenyaşar û semedê edliye padayîya ewro çalakîya xo keye de dewam kerdî.

 

'TC de welatijî binê erdî de edalet gêrenê'

 

Keyeyî serê hesabê xo yê medyaya dijîtalî de wina vat: "TC de welatijî edalet serê rîyê erdî de nêvînenê, coka binê erdî de edalet gêrenê. Kesêk (parlamenter) bi keyeyê xo dir nêweşxane de qirkerdiş keno. Mabêne ra 3 serrî derbas beno. Dozgerêk nêeşkeno qerarê nimteyî serê dosya ra wedarno. Ma do sere wedarnê û edalet bîyarê."