AMED - Kesûman Taşli ke semedê taxa Mevlana Xalît ya qezaya Rezanê Amedî wazena biba sey cinîyêke keya wina vat: "Baweriya jinê hêviyek mezin dide. Bawerîya înan serkewtişê heme cinîyan esto. Ez tewr zêde wazena biba vengê cinîyan."

 

Cinî êdî her wareyê cuye de bi rengê xo benê wayîrê rol û statûyêk. Wareyê sîyaset û komelî de zî benê model û nimûne. Nê cinîyan ra yew zî Kesûman Taşli ya ke semedê taxa Mevlana Xalîtî ya qezaya Rezanê Amedî de wazena biba sey cinîyêke keya. Menga nîsane de keyayê taxa Mevlana Xalitî ya qezeya Rezanê Amedî de Azîz Ezer ke serra 2019 de amebi weçînayîş,  dinyaya xo bedilna. Semedê weçînayîşê keyayî rê serrêke zêdeyêr mendo, do 6ê hezîrane de taxe de reyke bîn weçînayîş bêro kerdene û keyayêk newe bêro/a weçînayîş. Kesûman derheqê xebatanê xo de qisey kerd.

 

'Hêvî û bawerîya mi semedê serkewtişî esta' 

 

Kesûmane dîyar kerd ke aye taybetî wazena hêz cinîyan ra bigîro û vat: "Serra 2014ine de semedê demêk mîyanê Partîya Aştî û Demokrasî (BDP) de sey Endama Meclisê Şaredarîya Rezanî de mi ca girewtibi. Nika zî semedê na taxe wazena xeylêk çîyan bikera. Ez xebatanê xo de pêro kesan ra wazena hêz bigîra la bi taybetî cinîyan ra wazena hêz bigîra. Hêvî û bawerîya mi semedê serkewtişî esto."

 

'Ez wazena biba vengê cinîyan' 

 

Kesûmane dewam de wina vat: "Problemê taxe, keye û yê cinîyan xeylêk zêde estê. Tewr zêde problemê ekonomî zaf zêde yê. Prosesê xebatan de zî her keye problemê xo yê ekonomîye ardî serê ziwanî. Xêrcê nê tewr zêde cinî tewir bi tewir probleman vînenê. Ez wazena biba vengê cinîyan. Soz dana cinîyan ke sey keyayêk destê mi ra çi bêro ez o semedê cinîyan bikera."

 

'Wazena semedê cinîyan îstîhdam bikera'

 

Kesûmane tewr peyîn wina vat: "Ez wazena semedê ke destê cinîyan de karêk bibo xebityî. Semedê xebata cinîyan wazena kooperatîfek abikera. Sewbîna semedê tutan zî wazena xebate bikera. Taxa ma de cayêkê tûtî û cinî şêrê çin o. Cinî her wext verê berê awanîye de ronişnenê. Reyna tûtî taxe de kay kenê û kesê ke nêweşê û emrê înan pîl o aciz benê. Ez wazena nê babetan dir eleqedar biba û cayêkê ke tûtî bieşkê şêrê awan bikera. O wext do cinî zî tûtî zî wareyê înan bibo. Ez bieşkî na babete çi bikera ez o bikera."