Habîbe Eren

 

STENBOL - Hemsereka Pêroyî ya OHDî Îlknur Alcan derheqê kampanyaya îmzayan ya 'Ma nêbê hemkarê nê sucî’ ke semedê pêvînayîşê bi Rayberê PKKyî Abdullah Ocalan dir bêro destpêkerdene û 768 huqûqnasan îmza kerd de qisey kerd û vat: "Semedê welat demokratîk bo, ganî tecrîd bêro şiknayene."

 

Rayberê PKKyî Abdullah Ocalan ke 1999ine de bi komployêk mîyanneteweyî teslîmê Tirkîya ame kerdene, dima pêvînayîşê ke heqê qanûnî yê dem bi dem bixeyrê çalakîyê girseyî ameyî kerdene. 2011 de dimayê pêvînayîşê avûkatan Buroyê Huqûqê yê Asrinî 8 serrî dima yewin rey Gulana 2019ine de bi muvekîlê xo reyde pêvînayîş kerdî. Abdullah Ocalan 2019 de bi 5 avûkatan dir pêvînayîş kerd û 2020ine de yewin rey heqê telefonî xebitna. Heqê pêvînayîşê telefonî yê diyîn zî 4 deqe dewam kerd.

 

Cezaya dîsîplînî semedê pêvînayîşan asteng a 

 

Serdozgerîya Komara ya Bûrsayî bi bahaneyê ke Abdullah Ocalan 2009 de pawitişê xo şawito Dadgeha Heqê Merdiman ya Ewropa û bi bahaneyê amadekerdişê xerîteya rayîrî, 23yê Êlule 2020ine de 6 mengî qedexeyê pêvînayîşê bi avûkatan dir dabi. Dimayê prosesê qedexeyî temam bi, avûkatan reyna muracat kerd û 20ê Çeleyê 2021 de vejîya meydan ke cezayêke dîsîplînî yê newe ameya dayene.

 

Tecrîdo giran ke serê Abdullah Ocalan de dewam keno û tepişteyê PKK û PAJKî bi amancê wedaritişê tecrîdî 27ê teşrîna peyêne 2020ine de dest bi çalakîya grevê vêşanîye ya bêdem û bidor kerd û roja 191î de dewam keno.

 

Huqûqnasan ra kampanyaya îmzayî 

 

Komeleya Huqûqnasan Semedê Azadîye (OHD) derheqê tecrîdê  giran û zanayîşêk Îmraliyî nîno girewtene de bi sernameyê ‘ma nêbenê hemkarê nê sucî' kampanya dayî destpêkerdene.

 

768 avûkatî û huqûqnasî bi îlanê ke dayî rojnameyê Yenî Yaşamî kampanya eşkera kerdî û waştî ke vernîya pêvînayîşê avûkatanê Abdullah Ocalanî rê bêro akerdene. Metn de ame dîyarkerdene ke Abdullah Ocalan 7ê Tebaxe ra bi avûkatan dir pêvînayîş nêkerdo û vat, caardişê nê waştişî, esasê dewleta huqûqî yo. Mîyanê kesê ke îmza eştê metnî, hemserekê pêroyî yê demê verî yê HDPyî Selahattîn Demîrtaş, hemsereka pêroyî ya komeleya heqê merdiman Eren Keskîn û  avûkatê buroya Huqûqê yê Asrinî zî ca gênê.  

 

Hemsereka Pêroyî ya OHDyî Îlknur Alcan derheqê kampanya û sîstemê Îmraliyî de qisey kerd.

 

'Sîstemê Îmraliyî huqûq de çin o'

 

Îlknure dîyar kerd ke sîstemê Îmraliyî hemverê huqûqî yo û vat: "Sîstemê tecrîdê Îmraliyî hem hemverê huqûqê Tirkîye hem zî hemêverê pêkerdişê mîyanneteweyî yo. Tirkîya de destûrê bingehîn yê qanûnê înfazî de heqê ke yenê naskerdene estê. Qanûnan de ameyo dîyarkerdene ke heqê pêvînayîşî yê keye û avûkatan senîn bi tepişteyan dir virazêno. Metodê bêtêduştî Îmraliyî de yeno kerdene. Dimayê 2011ine ra bi avûkatan dir nêeşkeno pêvînayîş bikero. 2019ine de bi pêroyî 5 pêvînayîşî ameyî kerdene. Dima ra reyna tecrîd kewt dewre. Pêvînayîşê bi avûkatan dir, bi keyeyî dir, pêvînayîşê bi telefonî, şawitê mektub û faksan çin o. Heme  kanalê neqlkerdişî ameyê astengkerdene."

 

'DMME sey îşkenceyê sîstematîk qebûl keno'

 

Îlknure dewam de wina vat: "DMMEyî, astengkerdişê heqê neqlkerdişê tepişteyan sûc qebûl keno. Nê caardişê zîndanî, madeyê 3. DMMEyî bi eşkera binpay kenê. Ma sey OHDyî kampanya da destpêkerdene. Nêzdîyê 700 avûkatan îmza da. Ma waşt ke avûkatê Birêz Ocalanî bi eşkê pêvînayîş bikerê. Caardişê ke Îmraliyî de dest pê kenê, heme zîndanan de vila benê. Astengkerdişê pêvînayîşan hemverê huqûqî yo. Kes semedê tepişte yo, nê heqan ra ganî mehrûm nêbo. Avûkatî semedê nê çîyan kontrol kenê yê. Birêz Ocalan zî pêvînayîşê telefonî yê bi birayê xo dir keno vano, no bêhuqûqî yo. O zî zaf zelal vato ke ganî bi avûkatan dir pêvînayîş bikero."

 

'Tecrîd peymê polîtîkayî yo'

 

Îlknure vat sîstemê tecrîdî cuya xo de zî vînenê û vat: "Nimûne, Îmraliyî de kitabî ameyî sînorkerdene dima ra pêro zîndanan de vila bi. Ewro pandemî kenê bahane û kitaban nêdanê. Tecrîd heme atmosferê welatî de dîyar keno. Tecrîd, welat de sey peymê polîtîkayî yeno qebulkerdene. Ganî heme huqûqnas û welatijî wayîrê na kampanya vejîyê."

 

.