Sena Dolar

 

STENBOL - Koma Kampanyaya Pêkerdişê Stenbolî Ca Bîya ro ra Ferîde Eralp dîyar kerd ke do hemverê qerarê antişî her hewte çalakîyêke bi ca bîyarê û do 19ê Hezîrane de mîtîng bikerê û vat: "Îqtîdar heta 1ê Temmuze game nêerzo, do 1ê Temmuze semedê ma biba roja serewedaritene. Ez veng dana pêro cinîyan ke vejîyê meydanan."

 

Serekkomarê AKPyî Tayyîp Erdogan 20ê Adare de Pêkerdişê Stenbolî fesh kerd. Rojnameyê fermî yê 30ê Nîsane de ame vatene ke do pêkerdiş 1ê Temmuze de pêroyî bêro wedaritene. Bi rayberîya Koma Kampanyaya Pêkerdişê Stenbolî Bi Ca Bîya Ra,  Pêk Tirkîya de bi şîarê 'Ma fek pêkerdişî ra vera nêdanê' çalakî kerdî. Cinîyan qerarê çalakîyê bêmabên da û vatî 1ê Temmuze de cuye vindarnê.

 

Koma Kampanyaya Pêkerdişê Stenbolî Bi Ca Bîya Ra, rojê vîyarte de bi etîketê #failiserbest hewteyêk serê çapemenîya komelî de çalakî dayî destpêkerdene. Koma Kampanya ra Ferîde Eral vat, do cinî her hewte çalakîyê newe bikerê.

 

'Pêkerdiş bêro wedaritene zî ma do esasê ci bi ca bîyarê' 

 

Ferîde dîyar kerd ke pêkerdiş bêro wedaritene zî esasê pêkerdişî do bi ca bîyarê û vat: "Dimayê 1ê Temmuze zî têkoşîn eynî yo. Bêşik wedaritişê pêkerdişî cesaret dano kiştoxan. Ê diyîne zî yeno manaya ke mekanîzmayê cinî muracat kenê, baş bi ca nînê. Fekê kesêk ra pêkerdiş ameyo wedaritene. Pêwa nê ma do semedê esasê pêkerdişî bi ca bêro têkoşîn bikerê. Her ca de ma do têkoşînê cinsî tesîs bikerê.”

 

'Her hewte çalakîyêke'

 

Ferîde dewam de wina vat: "Pêkerdiş semedê şîdetê cinsê komelî werte ra wedarno, 4 esasan pêşkêş keno. Nînan ra yew zî cezakerdiş o. Eke şikdarê şîdetî bêceza bimanê do cesaret bigîrê. Ma bi etîketê #failiserbest serê çapemenîya komelî de çalakî dîya destpêkerdene û heta 1ê Temmuze ma do çalakîyan dewam bikerê."

 

'1ê Temmuze semedê ma roja serewedaritişî ya' 

 

Ferîde tewr peyîn qiseykerdişê xo de wina vat: "Heta 1ê Temmuze planê ma yê çalakîyê girseyî estê. Ma do ca û demê a roje ameyox de pare bikerê. 19ê Hezîrane de Platformê Cinîyan ê Semedê Têduştî (EŞÎK) do mîtîngê ‘Ma fek pêkerdişî ra vera nêdanê' organîze bikero. Derheqê ci de komîte ame awankerdene. Semedê nê menga hezîrane do xeylêk bi tevger ba. 1ê Temmuze semedê ma roja serewedaritişî ya. Ma do pîya kuçeyan de bê. Sewbîna çareyê ma çin o."