Medya Uren

 

MÊRDÎN - Cinî bi serran o hemverê rolê cinsî têkoşînêk danê ke her wareyî de ca bigîrê. Yew nê nimûneyan ra zî Eyşê Başboga ya, karê komirî kena. Semedê debara xo bikera, komir gêna, kena torbeyan û aşxaneyan de vila kena. Eyşê, bale ancena serê têkoşîn û keda cinîyan û vana cinî eşkenê her karî bikerê.

 

Cinî her rolê cinsî red kenê û vanê ma eşkenê her karî bikerê. Her çiqasî keda înan qij bêra vînayena û sey bêhêz bêrê vînayene zî ê her het ra bîyayîşê xo bi hawayê tewr xurt nîşan danê. Cinîya bi nameyê Eyşê Başboga semedê debara xo bikerê zî hemverê feqîrî dest bi karê komirî kenê. Karê ci karêkê zor o û problemê weşîye xo dir ano, la aye vana cinîyî her wext rolê fedekarî kay kenê û ez zî ewro semedê tûtê mi vêşan nêmanê nê karî kena. Ma do têkoşîn û keda Eyşê goşdarî bikerê.

 

Bi karê nanê tenûre ra dest pêkena

 

Eyşê taxa Tepebaşî ya girêdayê qezaya Qoserê Mêrdînî de ronişnena. Ê keyeyêk feqîr bî û hetê debare de problemê pîlan ciwîyayîne. Eyşê, destpêk de bi nanê tenûre debara xo kerdêne. Derûdorî mîr ardêne, aye zî tenûre dayîne pawa û pereyê xo girewtêne. A û mêrdeyê xo bi karê wina qijî dir destê yewbînan gênê û hewl danê 3 tutanê xo pîl bikerê. Eyşê û mêrdeyê xo dest bi karê komirî kenê û 3 serrî yo dewam kenê. Taxa Tepebaşiyî binê keyeyê xo de sey qulêkê qij dikanê komirî akerda. Eyşê eynî wextî de karê xo yê nanê tenûre zî dana dewamkerdene.

 

'Karê mi karêkê zor o' 

 

Karê komirî bêşik beno sebebê problemanê pîlan yê weşîye. Sewbîna derûdor zî lêşin keno. Ma eşkenê nê ra fam bikerê ke Eyşê zehmetîyê pîlan ciwîyena, la mecbûr a semedê debara xo bikera xebityena. Wextê ma Eyşê vînenê karê xo yê tenûre ra yena û kargehê xo yê komirî akerdêne. Eyşê sere de kargehê xo ma rê dana naskerdene û vana: "No karêkê zor o. Hetê boygirewtişî de hema zî ez probleman ciwîyena. Semedê derûdor aciz nêbo û tesîr nêbê zî ez dergehan gêna û ganî kolikê sergirewte de dest bi karê xo kena. Eke wareyê akerdeyî bo do hîna başêr bo, la îmkanê ma hende yê."

 

'Cinî her wext rolê fedekarî kay kenê'

 

Eyşê wina dewam kerd: "Her wext cuya ma bi kede dir derbas bî. Seke mi vat, mêrdeyê mi tena komir bi makîne ano la sewbîna heme karê komirî dir ez eleqedar bena. Ez karê xo û ey zî kena. O rast cinî eşkenê her karî bikerê û her wext tewr zêde xebitênê. La ganî merdim semedê xo û  semedê tutanê xo pîya têkoşîn bikerê. Roja ewro de çiqas cinî serkêşîyê nê têkoşîn kenê zî camêrdî kede nêvînenê. Labelê cinî rixmê her çî û heme şert û mercan de tim rolê fedekarî kay kena. Semedê tutanê xo û semedê keyeyê xo fedekarî kena."

 

'Ganî cinî her karî de cayê xo bigîrê'

 

Eyşê tewr wina vat: "Ma semedê  serê linganê xo de vinderê û debara xo bikerê ma her çî kenê. Labelê çi heyf, her wext verê linganê ma de  astengîyan rêz kenê. Nika zî ma nêeşkenê debara xo bikerê. 3 tûtê mi mektebe wanenê. Ne tablet, ne înternetê înan esto ke beşdarê dersê xo bibê. Netîce de zî îmtîhananê xo derbas nêkenê. No bêtêduştî psîkolojîyê komelî zî xira keno. Bi hêvîya ke polîtîkayê ekonomî bêrê pêşkêşkerdene. Coka wina dewam bikero do şar nêeşkeno debara xo bikero. Bi taybetî zî tesîrêk pîl serê cinîyan de keno. Ganî paştdayîş semedê cinî û karkerî bê temînat xebityenê bêro dayene. Semedê ke ma cinîyî zî mîyanê her karî de cayê xo bigîrê, ganî paştdayîş bidê."